Tħabbret il-mewt tal-ex Ministru tas-Saħħa Vincent Moran, li jibqa’ mfakkar għall-kontribut politiku tiegħu fil-qasam tas-saħħa. It-tabib Moran serva f’żewġ leġiżlaturi bħala Ministru tas-Saħħa u tal-Ambjent bejn l-1976 u l-1981. Huwa miet fl-età ta’ 86 sena f’Karen Grech.

It-tabib Vincent Moran kien tabib tal-familja popolari iżda jibqa’ magħruf l-iżjed għas-sehem tiegħu fis-servizz tas-saħħa bħala Ministru tas-Saħħa meta wettaq diversi riformi mill-ftuħ tal-ewwel ċentri tas-saħħa u l-ITU.

Beda l-karriera politika tiegħu fl-1948 meta ssieħeb fil-Partit Laburista. Huwa kkontesta b’suċċess seba’ elezzjonijiet ġenerali. Fl-1976 u l-1981, il-Prim Ministru Dom Mintoff fdalu d-dekasteru tas-Saħħa.

Fil-programm ta’ TVM Bijografiji, Dr Moran kien ġie intervistat u qal, “Kelli l-unur li nkun il-Ministru tas-Saħħa bil-prinċipji, bl-ideoloġija, bil-proramm elettorali li nagħtu l-kura, is-saħħa, is-servizz tas-saħħa b’xejn lil kulħadd … Kienu nbdew ukoll l-open heart surgery, kien inbeda l-operazzjojiet tar-ras, kienu nbdew it-trapjanti tal-organi, bdeja bit-trapjanti tal-kliewi, daħlet ukoll il-plastic surgery.”

Dawn huma xi ritratti antiki mill-ħajja politika ta’ Dr Moran:

L-Ambaxxatur Anthony Debono, li kien is-Segretarju Privat tal-Ministru Moran qal li l-kwalitajiet ta’ Dr Moran ħarġu fost oħrajn fl-istrajk tat-tobba.  Huwa qal, “Bl-attitudni pożittiva tiegħu, l-enerġija u l-istamina li kellu u l-mod li bih konna niddisukutu kemm Malta kif ukoll internazzjonalment, allura stajna mmexxu billi nagħmlu numru ta’ ftehim ma’ pajjiżi barranin biex inkunu nistgħu nġibu t-tobba, fil-fatt għamilna ma’ xi tmien pajjiżi u kontinwament konna nbiddlu t-tobba, saħansitra ġibna professuri ta’ klassi mondjali bħalma huwa fil-plastic surgery li huwa Prof. Fara.”

Is-Sur Debono qal li l-Ministru Moran wettaq rivoluzzjoni fil-qasam tas-saħħa.  “Sar l-Isptar Karin Grech, l-isptar li kien għat-tfal, li kien għall-materinta’, il-Half Way House tal-Mental Hospital, għamilna s-CCU – allura l-operazzjonijiet li konna nibagħtu barra kienu qed isiru hawnhekk għax kellna l-apparat. U għamilna wkoll storja għal Malta mal-United Nations għax il-proposta tagħna biex nagħmlu istitut tal-anzjani f’Malta ġiet approvata fin-1982,” kompla jgħid l-ex Segretarju Privat ta’ Dr Moran.

Is-Sur Debono qal dawn il-proġetti jibqgħu monument ħaj ta’ Dr Moran.