Lokali
Imut Twanny Scalpello – jibqa’ mfakkar għall-vuċi tiegħu

Miet Twanny Scalpello – il-vuċi li akkumpanjat ħafna ġenerazzjonijiet ta’ semmiegħa ta’ Radju Malta fil-qari tar-rumanzi.

Imwieled il-Belt imma trabba u għex Tas-Sliema, Twanny Scalpello miet ilbieraħ fl-isptar Mater Dei fl-età ta’ 94 sena. Għalkemm jibqa’ maghruf għall-vuċi distintiva tiegħu fuq ir-radju, Twanny Scalpello kien attur kemm għat-televiżjoni u anke fit-teatri.

L-ewwel teledramm li bih fetaħ TVM fil-bidu tas-snin sittin kien Erwieħ Marbuta mill-pinna ta’ Ġużè Diacono, bl-atturi ewlenin Carmen Azzopardi u Twanny Scalpello, li ma ħarisx lura u baqa’ għaddej b’karriera twila fuq il-palk u wara l-mikrofoni ta’ Radju Malta.

L-ewwel rumanz li qara għas-semmiegħa ta’ Radju Malta kien Fula Maqsuma ta’ Karmenu Micallef. Twanny Scalpello għamel karriera ta’ 40 sena jaqra r-rumanzi kemm ta’ kittieba Maltin u anke traduzzjonijiet ta’ rumanzi minn kittieba barranin.

Ritratt: Xena ma’ Eileen Montensin fid-drama Ejja Tabib Għax Għandi t-Taqlib.