Saħħa
Inawgurat iċ-Ċentru ġdid tas-Saħħa f’Ħal Kirkop

Inawgurat iċ-ċentru tas-saħħa ta’ Ħal Kirkop li sar b’investiment ta’ aktar minn miljun ewro, u li se jibda jilqa’ lin-nies mill-ġimgħa d-dieħla. Fl-inawgurazzjoni l-Prim Ministru Joseph Muscat u l-Ministru tas-Saħħa Chris Fearne qalu li l-investiment tal-Gvern taċ-ċentru tas-saħħa fil-komunità ser jissokta bi proġetti, fost oħrajn, fil-Gżira u f’Għawdex, biex il-kura primarja tkompli tingħata prijorità fis-servizzi tas-saħħa.

Mill-ġimgħa d-dieħla, ir-residenti ta’ Ħal Kirkop, tal-Qrendi, l-Imqabba, iż-Żurrieq, Ħal Farruġ u Ħal Luqa fost oħrajn, ser jinqdew miċ-ċentru tas-saħħa ġdid li ġie inawgurat f’Ħal Kirkop. Minn dan iċ-ċentru se jingħataw 17-il servizz tal-kura primarja fosthom ta’ tabib, tilqim tat-tfal, teħid tad-demm u is-saħħa tal-mara fost oħrajn.

Fl-inawgurazzjoni l-Prim Ministru qal li kull Gvern investa fil-qasam tas-saħħa, iżda l-investiment fil-kura fil-komunità kien waqa’ lura. Qal li l-aħħar ċentru tas-saħħa gdid nfetaħ 19-il sena ilu f’Birkirkara. Dr Muscat qal li l-Gvern huwa mpenjat li jiftaħ aktar ċentri tas-saħħa biex iwassal il-kura primarja fil-komunità.

“Il-pass li jmiss għalina huwa li nneħħu ftit mill-pressjoni li hemm fuq iċ-ċentru tas-saħħa tal-Mosta billi niftħu ċentru tas-saħħa ieħor fin-naħa ta’ fuq tal-pajjiż u nduru ċ-ċentri tas-saħħa eżistenti, l-prijorità hi tal-Gżira, fejn hemm numru ta’ problemi strutturali li ilhom is-snin biex ikun aktar aċċessibbli,” qal il-Prim Ministru.

Dr Muscat qal li b’dan iċ-ċentru tas-saħħa f’Ħal Kirkop se tonqos il-pressjoni kemm minn fuq l-isptar kif ukoll miċ-ċentru tas-saħħa tal-Floriana, fejn in-nies tal-inħawi kienu jinqdew qabel. Il-Prim Ministru qal li l-għan tal-Gvern hu li l-pazjent jinqeda aħjar f’inqas ħin. Semma li bi sħab mal-privat, Steward Healthcare, fil-ġimgħat li ġejjin, ser ikollha ċentru tal-anatomija f’Għawdex u sal-aħħar tas-sena għandha titlesta l-iskola ta’ Barts.

Id-Deputat Prim Ministru u Ministru tas-Saħħa Chris Fearne qal li s-saħħa tibqa’ l-aktar ħaġa importanti għall-bniedem u għalhekk il-Gvern jibqa’ jagħtiha l-importanza li tixirqilha. “Ħa nżidu wkoll ċentru tas-saħħa ġdid ġewwa Għawdex, ir-Rabat Għawdex, għax Għawdex hemm ċentru tas-saħħa li ilu ħafna u għandu bżonn refurbishment. U għandna l-Paola Hub, li hemmhekk il-proċess tal-aġġudikazzjoni tat-tenders huwa miexi tajjeb ħafna wkoll.”

Ara wkoll:

Daqt ċentru tas-saħħa ġdid għal 28,000 ruħ f’Ħal Kirkop u l-madwar

Aħbarijiet Oħra
Ambjent

Kruċjali għall-ħajja ta’ kulħadd…u għal Malta hu riżorsa prezzjuż daqs id-deheb! Hawnhekk qed nirreferu għall-ilma. Hu stmat li kull persuna f’Malta tuża mal-110 litri ta’ ilma kuljum. Il-pubbliku jista’ jitgħallem…

Pulizija

Sal-aħħar tas-sena d-dieħla, il-Korp tal-Pulizija għandu jkollu strateġija ta’ trasformazzjoni. F’intervista estensiva mal-Kap Eżekuttiv tal-Pulizija li tixxandar fil-programm DISSETT wara dan il-bulettin, is-Sur Gafa’ qal li d-direzzjoni tat-tiġdid ser isir…

Politika

Il-Prim Ministru u l-Mexxej tal-Partit Laburista, Joseph Muscat, akkuża lill-Partit Nazzjonalista li ma ppreżentax biżżejjed kandidati għall-elezzjonijiet tal-Kunsilli Lokali fi 23 lokalità f’Malta u f’Għawdex bl-għan li jiskoraġixxxi lin-nies milli…

Għawdex

Tnieda l-proġett għall-installazzjoni tat-tieni fibre optic cable bejn Malta u Għawdex, bil-gvern iħabbar li l-proġett se jitwettaq minn kumpanija Taljana. Il-cable il-ġdid mistenni jsaħħaħ l-infrastruttura diġitali f’Għawdex u jżid il-potenzjal…

Aktar