Lokali
Inawgurata faċilità ġdida fil-kumpanija De La Rue wara investiment ta’ 15-il miljun ewro

Inawgurata faċilità ġdida fil-kumpanija De La Rue f’Bulebel wara investiment ta’ 15-il miljun ewro, li sa issa sarfet f’70 impjieg ġdid f’din il-kumpanija li tipproduċi flus, passaporti u prodotti oħra ta’ sigurtà.

Fl-inawgurazzjoni, il-Prim Ministru Joseph Muscat qal li din il-kumpanija li kienet ser tnaqqas il-ħaddiema, b’ħidma mal-Gvern, żiedet l-investiment f’Malta biex issa ser tkun tħaddem mal-580 ħaddiem.

Il-kumpanija internazzjonali De La Rue, li għandha storja ta’ aktar minn 40 sena f’Malta, inawgurat faċilità ġdida għal produzzjoni ta’ prodotti ta’ sigurtà wara li l-kumpanija ddiversifikat in-negozju tagħha mill-istampar tal-flus.

Id-Direttur tal-De La Rue Malta, Edward Chetcuti qal li fl-aħħar sentejn il-kumpanija għamlet investiment ta’ 27 miljun ewro f’ċentru ta’ eċċellenza fil-faċilità ta’ Bulebel. Minnu apparti l-produzzjoni tal-passaporti, ser jibdew isiru prodotti ta’ sigurtà  bħal tikketti ta’ prodotti bħat-tabakk u l-alkoħol, biex jgħinu l-gvernjiet u l-kumpaniji fit-traċċibilità u l-awtentiċità tal-prodotti.

Is-Sur Chetcuti spjega li l-kumpanija għandha l-kapaċità li tipproduċi wkoll tikketti li jassiguraw il-protezzjoni tal-kumpaniji. De La Rue Malta ser tkun qed tforni tikketti għal kumpaniji internazzjonali, bħal Microsoft. Fuqhom jitniżżel tagħrif dwar il-prodott, inkluż fejn ikun inħadem.

Fl-inawgurazzjoni tal-faċilità l-ġdida, il-Prim Ministru Joseph Muscat qal li l-ħaddiema għandhom rashom mistrieħa mill-impjieg tagħhom, hekk kif il-kumpanija kompliet issaħħaħ l-operat tagħha mingħajr ma ssagrifikat il-produzzjoni tal-flus.

Il-Prim Ministru Muscat qal li l-investiment ta’ kumpaniji li diġà jinsabu f’Malta hija xhieda tal-fiduċja tagħhom fl-ekonomija u l-ħaddiema Maltin.

Aħbarijiet Oħra
Għawdex

F’Għawdex tnieda servizz ta’ emerġenza ġdid għall-pubbliku li se jopera wara l-ħinijiet tal-uffiċċju, fi tmiem il-ġimgħa kif ukoll fil-btajjel pubbliċi. Dan is-servizz, li beda fuq inizjattiva tal-fergħa Għawdxija tal-Fondazzjoni għal…

Annimali

F’dan iż-żmien tas-sena ħafna jsibu ħin biex jagħmlu atti ta’ imħabba jew solidarjetà mal-oħrajn. Artista Franċiża li tgħix Malta ddeċidiet li ttella’ wirja b’pitturi biex bil-flus li tiġbor mill-bejgħ tagħhom,…

Mużika

Il-kunċert tal-President għas-Sena l-Ġdida se jżomm mat-tradizzjoni u jsir fl-Epifanija fis-6 ta’ Jannar f’Dar il-Mediterran għall-konferenzi l-Belt. Il-kunċert b’kollaborazzjoni ma’ Festival Malta u l-Orkestra Filarmonika ta’ Malta se jsir b’risq…

Kronaka

L-awtoritajiet tal-Faċilità Korrettiva ta’ Kordin qed jinvestigaw il-mewt ta’ priġunier Malti ta’ 26 sena li nstab mejjet. Television Malta jinsab infurmat li l-priġunier neħħa ħajtu. Fi stqarrija maħruġa mill-Faċilità Korrettiva…

Aktar