Stejjer Umani
Induna li għandu l-Parkinson’s waqt li fetaħ idejh fit-talba tal-Missierna

Iż-żfin għal ħafna huwa mezz ta’ soċjalizzazzjoni u divertiment imma għal Joe Saliba, li għandu 72 sena, iż-żfin huwa aktar minn żvog.

Joe huwa fost bosta persuni li ħadu l-parir professjonali li jfittxu l-movimenti taż-żfin biex itaffu l-effetti tal-Parkinson’s. Kien waqt it-talba tal-Missierna li xegħlitlu l-bozza l-ħamra. “Kienet għadha ħajja l-mara konna nagħmlu ċertu talb u fil-Missierna niftħu jdejna u indunat li din qed tiċċaqlaq,” jiftakar Joe.

Waqt it-talba tal-Missierna, Joe innota li idu x-xellugija bdiet titriegħed. Wara ħafna testijiet irriżulta li Joe għandu l-Parkinson’s.

Il-Parkinson’s ma tħallihx jorqod. “Idejja tibda tiċċaqlaq u ma nkunx nista’ norqod. Allura jrid jaqbadni vera ngħas u ħafna drabi qabel nofsillejl, is-siegħa ma norqodx.”

Ftit wara li skopra li għandu l-Parkinson’s, Joe ħa daqqa ta’ ħarta oħra; tilef lil martu Carmen. “Il-mara kienet fuq tagħha, u kont ngħidilha ‘int melħa, tagħmel ħbieb ma’ kulħadd’ u kont nammiraha. Issa jien illum qiegħed nipprova noħroġ minni nnifsi u nixbaha,” jistqarr Joe.

Għal Joe l-ħajja trid tkompli u qed jgħixha jum b’jum. “Il-mara qatt ma mardet b’qalbha u telqet. Jien marid b’qalbi u għadu jridni l-Mulej. Il-missjoni għadha ma spiċċatx.”

Is-sigriet biex Joe ma jaqax f’dipressjoni huwa li joħroġ u jagħmilha man-nies. L-iżvog tiegħu sabu fiż-żfin li jservih ta’ terapija għall-Parkinson’s. “Terapija ħafna jgħinni, għax inti meta tmur hemm tkun inkwetat għandek siegħa, siegħa u nofs, moħħok trankwill. Apparti minn hekk qed tagħmel l-eżerċizzju.”

Jattendi għal-lezzjonijiet taż-żfin sa erba’ darbiet fil-ġimgħa. “Pereżempju Singing in the Rain, u fl-istess ħin qed nieħdu pjaċir għax nidħku, għax qatt ma bsart li fi xjuħiti se noqgħod niżfen,” jgħid Joe.

Ix-xewqa ta’ Joe hi li tinstab kura għal din il-marda kiefra li qed iżżomm ħafna nies milli jgħixu ħajjithom fil-milja tagħha.

Aħbarijiet Oħra
Lokali

Minn hawn u ftit tal-ħin ieħor, il-Prim Ministru Joseph Muscat se jkun qed jindirizza konferenza tal-aħbarijiet. Ix-xandira tistgħu ssegwuha dirett minn tvm.com.mt. Iktar dettalji fil-ħin li ġej.

Lokali

Il-Ministeru tal-Familja u s-Solidarjetà Soċjali qassam €150,000 lil għaxar Kunsilli Lokali biex jirrenovaw il-housing estates fil-lokalità tagħhom. Fost il-kunsilli li ngħataw il-fondi hemm tal-Marsa, il-Ħamrun, Santa Venera, il-Belt Valletta u…

Lokali

Ilbieraħ filgħaxija l-GRTU qalet li xi membri tagħha li ssieħbu fi ftehim esklussiv ta’ franchising mal-Enemed ġew mhedda minn uffiċjali tal-kumpanija li jekk jieħdu sehem fl-azzjonijiet ikun hemm riperkussjonijiet fuqhom….

Aktar