Kurżitajiet
Influencers offruti flejjes kbar għas-sess

Persuni hekk imsejħa influencers fuq il-midja soċjali, qed jiġu offruti eluf kbar ta’ flus għas-sess. Rapporti f’midja internazzjonali qalu kif il-midja soċjali, partikolarment l-Instagram, qed iservi bħal katalgu biex rġiel jagħżlu l-mara li jixtiequ.

Tyne-Lexy Clarson, waħda minn dawn l-influencers qalet li ġieli rċeviet dawn il-messaġġi. Qalet li ta’ 19-il sena, ġiet offruta £20,000 biex toħroġ tiekol u tixrob mal-persuna.

Wara li ħadet sehem fit-tieni edizzjoni tal-programm Love Island madanakollu, rċeviet imejl mingħand aġenzija li offritilha £50,000 għal ħamest iljieli f’Dubaj. Ġiet mitluba anke tiffirma ftehim ta’ ‘non-disclosure’, fejn tkun marbuta li ma tgħid lil ħadd b’dak li għamlet.

Clarson qalet li rrifjutat din l-offerta, iżda tibża li influencers li ma jkunux sejrin tajjeb, u ma jibdewx jirċievu oġġetti lussużi x’jirreklamaw, jaqgħu għal dawn it-tip t’offerti. Żiedet li dawn huma flus kbar għal xi nies, li bihom kapaċi jbiddlu ħajjithom.

Rosie Williams, influencer oħra li ħadet sehem fit-tielet edizzjoni ta’ Love Island, qalet li ġiet offruta £100,000 fis-sena, inkluż il-ħwejjeġ u l-basktijiet kollha tagħha, biex issir partner ta’ raġel f’Dubai.