Annimali
Intervent f’waqtu biex isalvawhom minn ħalq il-mewt

Salvati mill-ħalq il-mewt ħamest iqniefed li kienu fil-periklu li jitgħaffġu mill-karozzi wara li spiċċaw mingħajr l-ambjent naturali tagħhom.

Dan hekk kif voluntiera ta’ Nature Trust Malta, residenti u uffiċċjali tal-Awtorità għall-Ambjent u r-Riżorsi (ERA) marru jneħħu lill-qniefed mill-inħawi fejn kienu qed isiru x-xogħlijiet fl-aħħar jiem fi Triq l-Imdina f’Ħ’Attard fejn qed jinqalgħu xi siġar.

Filwaqt li ppubblikat dan ir-ritratt, l-għaqda Nature Trust Malta qalet fuq is-siti soċjali li qed tagħmel pressjoni biex l-awtoritajiet isiru iktar proattivi u jippjanar ir-rilokazzjoni tal-annimali li jgħixu fis-selvaġġ qabel ma jsiru xi xogħlijiet biex jiġu evitati dat-tip ta’ sitwazzjonijiet.

L-għaqda ambjentali aġixxiet wara diversi rapporti li rċeviet dwar dawn il-qniefed li spiċċaw fit-triq waqt li qed jitneħħew is-siġar fi Triq l-Imdina.

Ir-rapporti jistgħu jsiru wkoll lill-ERA fuq in-numru t’emerġenza 99210404.