Barranin
Ippubblika ritratt u qajjem l-irwiefen

Bosta persuni jinsabu rrabjati u urtati b’ritratt li ppubblika l-Ministru tal-Intern Taljan ilbieraħ f’Ħadd il-Għid.

Hekk propju f’Ħadd il-Għid imdemmi fejn tilfu ħajjithom traġikament 290 persuna f’attakk terroristiku fis-Sri Lanka, l-uffiċċju ta’ Matteo Salvini għażel li jippubblika ritratt tiegħu jġorr arma tan-nar waqt avveniment pubbliku.

Ir-ritratt ġie ppubblikat minn Luca Morisi, l-assistent personali tal-Ministru tal-Intern, fejn qal li l-partit tiegħu jinsab dejjem armat sa snienu u mhu se jħalli lil ħadd jitfa’ tajn fuqu.

Il-kittieb ta’ Gomorra, Roberto Saviano, sejjaħ lil Salvini bħala Ministru tal-Mala Vita (Mafja) li qed iwassal messaġġ ċar – li l-poter tela’ għal rasu u li huwa bniedem perikoluż u bla skrupli. Oħrajn qalu li r-ritratt ippubblikat propju fil-ġurnata traġika tal-bieraħ turi nuqqas ta’ rispett u sensittività mal-vittmi li mietu fis-Sri Lanka u l-familji tagħhom.