Politika
Ir-rappreżentant tal-UN f’Malta – itenni l-impenn għal soluzzjoni politika fil-Libja

Ftit jiem biss wara li qatlulu b’Benghazi tliet gwardji tas-sigurtà tiegħu, ir-rappreżentant speċjali tan-Nazzjonijiet Magħquda fil-Libja, Ghassam Salame, kien Malta b’uffiċjali tas-sigurtà ġodda, u kellu taħditiet mal-Ministru tal-Affarijiet Barranin Carmelo Abela.

F’konferenza tal-aħbarijiet, Salame u l-Ministru Abela tennew l-impenn favur soluzzjoni politika għall-kunflitt Libjan, waqt li saħqu li m’hemmx soluzzjoni oħra, ħlief dik li tista’ tinstab madwar il-mejda tat-taħditiet.

B’missjoni mill-aktar diffiċli biex iqarreb il-mexxejja rivali fil-Libja, il-mibghut speċjali tan-Nazzjonijiet Magħquda mhux qalbu maqtugħa li n-naħat rivali fil-Libja jerġgħu lura għan-negozjati. Meta wieġeb mistoqsijiet ta’ TVM, Salame stqarr li n-negozjati li kienu qed isiru sa’ April kien qed jagħtu riżultati, u għalkemm ma semmiex lill-Ġeneral Haftar, li beda l-offensiva fuq Tripli f’April li għadda, stqarr li kien hemm min ħoloq devjazzjoni fin-negozjati.

Il-mibgħut tan-Nazzjonijiet Magħquda qal li l-problema tal-Libja ma tistax tiġi solvuta bl-armi, u żied jgħid li huwa fiduċjuż li fi żmien qasir, il-mexxejja Libjani ser jagħrfu dan.

Id-diplomatiku tan-Nazzjonijiet Magħquda qal li jaf il-qrubija ta’ Malta mal-Libja u l-vuċi ta’ Malta fil-fora Ewropej favur soluzzjoni Libjana. Il-Ministru Abela qal li l-gvern Malti jappoġġja l-inizjattivi tan-Nazzjonijiet Magħquda biex jerġa’ jkun hemm il-paċi u l-istabbiltà fil-Libja.

Mistoqsi dwar is-sigurtà u l-kwistjoni tal-immigrazzjoni, Salame qal li ma jistax jgħid li l-Libja hija pajjiż sigur. Dwar l-immigrazzjoni, il-mibgħut tan-Nazzjonijiet Magħquda nnota li naqsu l-immigranti li qed jitilqu mil-Libja, u għalkemm is-sitwazzjoni mhix l-aħjar li tista’ tkun, stqarr li l-awtoritajiet Libjani qegħdin jagħmlu sforzi aktar minn qatt qabel biex jindirizzaw din il-problema.

Aħbarijiet Oħra
Edukazzjoni

Fix-xhur tas-sajf, meta ħafna mill-iskejjel ikunu baħħ, il-Ministeru tal-Edukazzjoni ħa l-okkażjoni jwettaq xogħlijiet ta’ manutenzjoni u tisbiħ u faċilitajiet ġodda fi kważi 100 skola tal-Gvern madwar Malta u Għawdex. Ħafna…

Kultura

Għaddej ir-restawr tal-eqdem binja fil-Mellieħa . . . kumpless ta’ tmintax-il kamra li kienu nbnew biex joffru spazju għal ftit ħin ta’ mistrieħ lill-pellegrini li jżuru s-santwarju tal-Madonna tal-Mellieħa. Il-qagħda…

Kostruzzjoni

L-Assoċjazzjoni tal-Iżviluppaturi (MDA) tikkundanna r-rimi illegali ta’ skart tal-kostruzzjoni f’postijiet pubbliċi. Dan l-assoċjazzjoni qalitu fi stqarrija wara t-tħassib li wera l-pubbliku fuq il-media soċjali, f’dak li għandu x’jaqsam mar-rimi ta’…

Lokali

Il-Prim Ministru Joseph Muscat qal li l-Gvern ma jistax jindaħal biex iwaqqaf kawżi ċivili li jkunu nfetħu minn ċittadini privati jew minn terzi kontra ġurnalisti li jkunu ġew nieqsa u…

Aktar