Toroq
Is-sena d-dieħla ppjanat li jibdew u jitlestew xogħlijiet f’120 triq residenzjali

L-aġenzija tat-toroq, Infrastructure Malta, qed tippjana li s-sena d-dieħla jitlestew il-120 triq residenzjali li x-xogħol fuqhom se jibda mill-bidu tas-sena d-dieħla.

Waqt li ta dettalji tax-xogħlijiet infrastrutturali li saru matul is-sajf, il-Ministru għall-Trasport u l-Infrastruttura Ian Borg, qal li Infrastructure Malta diġà qed tidentifika t-tieni grupp ta’ toroq residenzjali li jridu jsiru bħala parti mill-investiment ta’ €700 miljun f’toroq f’seba’ snin.

Għalkemm ix-xogħlijiet fuq l-ewwel grupp ta’ 120 triq residenzjali għadhom ma bdewx, Infrastructure Malta qiegħda fil-proċess li tidentifika t-tieni grupp ta’ toroq residenzjali li għandhom bżonn dawra tajba minħabba l-istat ħażin li jinsabu fih.

Il-Kap Eżekuttiv ta’ Infrastructure Malta, Frederick Azzopardi, qal li se tibda titħaddem sistema ġdida li se żżid l-effiċjenza fil-bini tat-toroq.

Il-Kap Eżekuttiv ta’ Infrastructure Malta, Frederick Azzopardi “kull kuntrattur jekk jiġi awarded ix-xogħol irid jikkommetti ruħu li dejjem ikun qed jaħdem fuq sitt toroq differenti fl-istess ħin. Għaldaqstant meta dawn ix-xogħlijiet jibdew se jkollna minn dawn il-120, dejjem xogħlijiet għaddejjin fuq 30 fl-istess ħin. Bis-saħħa ta’ hekk se jagħmilha possibbli li nlestu dawn il-120 triq is-sena d-dieħla.”

Il-Ministru għat-Trasport u l-Infrastruttura Ian Borg ta rendikont tax-xogħlijiet infrastrutturali li saru matul is-sajf b’investiment ta’ €17-il miljun. Fost oħrajn, il-Ministru Borg qal li l-proġett tal-Marsa-Ħamrun Bypass u Vjal l-Avjazzjoni, li jgħaqqad Ħal Kirkop ma’ Ħal Luqa, naqqas bil-kbir il-ħin tal-istennija għas-sewwieqa. Semma’ wkoll ix-xogħlijiet li saru f’għadd ta’ roundabouts fosthom tal-Mosta Technopark u f’Ħaż-Żebbuġ li qal tejbu l-andament tat-traffiku.

Il-Ministru għat-Trasport u l-Infrastruttura, Ian Borg ”intervjenejna wkoll b’affarijiet sempliċi bħal Ta’ Qali, il-proġett tal-Ħemsija u t-Telgħa ta’ Alla u Ommu fejn kellek bottlenecks sempliċi li ħadd qatt ma ried jiddeċiedi fuqhom u ħadd ma ried jintervjeni.”

Dwar il-proġett tal-Marsa Junction, Dr Borg qal li fil-ġimgħat li ġejjin il-karreġġjati fi Triq Aldo Moro se jiżdiedu għal 10 u wara tibda l-ħidma fuq il-flyovers. Qal li Infrastructure Malta għaddejja bit-tħejjijiet biex jibdew ix-xogħlijiet fuq il-mini ta’ Santa Luċija u l-proġett Central Link f’Ħ’Attard fost oħrajn.

Aħbarijiet Oħra
Droga

L-Aġenziji li jaħdmu mal-vittmi tad-droga fosthom is-Sedqa u l-Caritas huma tal-fehma li l-użu rikreattiv tal-kannabis m’għandux ikun promoss għax ikattar il-kultura favur l-abbuż tad-droga. Din il-fehma intweriet waqt il-programm Dissett…

Partit Nazzjonalista

Il-President tal-Kunsill Ġenerali tal-Partit Nazzjonalista Kristy Debono qalet fi stqarrija li sabet li 84 mill-200 firma fil-petizzjoni li titlob biex jitlaqqa’ l-Kunsill Ġenerali biex jiddiskuti l-ġejjieni tal-Kap tal-Partit Nazzjonalista huma…

Lokali

Ta’ tnax-il sena sofriet diżabilità minħabba mard u wara ħafna snin ta’ żwieġ kellha tifel bil-kundizzjoni down syndrome. Minkejja l-isfidi, Lorraine Pellicano tgħid li Thomas berkilha ħajjitha u ħerqana li…

Lokali

Meqjusa fost l-ewwel tobba f’Malta li bdiet taħdem bla heda mal-vittmi tad-droga, ħidmet it-tabiba Maria Sciberras tfakkret f’konferenza f’għeluq il-25 sena mit-twaqqif tal-Aġenzija Sedqa u fil-jum internazzjonali kontra l-abbuż u…

Aktar