Unjoni Ewropea
Is-Soċjalist David Sassoli elett President tal-Parlament Ewropew

Se jerġa’ jkun Taljan imma minn grupp politiku differenti l-President il-ġdid tal-Parlament Ewropew. Is-suċċessur ta’ Antonio Tajani mill-grupp tal-Partit Popolari Ewropew se jkun David-Maria Sassoli mill-Alleanza Progressiva tas-Soċjalisti u d-Demokratiċi. Hu se jokkupa l-kariga għas-sentejn u nofs li ġejjin. Sassoli, li ħafna jiftakruh jaqra l-aħbarijiet fuq RAI UNO, ilu membru tal-Parlament Ewropew 10 snin.

Sassoli ġie elett fit-tieni rawnd, wara li fl-ewwel votazzjoni ħadd mill-erba’ kandidati ma kiseb il-maġġoranza assoluta tal-voti. F’votazzjoni sigrieta, l-indikjazzjoni ta’ appoġġ lit-Taljan dehret mill-ewwel, għax fl-ewwel votazzjoni Sassoli kiseb 325 mis-662 vot validu, seba’ voti biss anqas mill-maġġoranza meħtieġa biex jiġi elett. Fil-votazzjoni li segwiet hu kiseb maġġoranza bi 345 vot.

Fl-ewwel kummenti wara l-vot, David-Maria Sassoli tkellem dwar il-ħtieġa ta’ riforma fl-Unjoni Eweropea, biex fi kliemu tirritorna għall-għeruq u l-valuri tal-fundaturi tagħha. B’referenza għall-politika Ewropea dwar il-migrazzjoni, Sassoli wera l-fehma li l-Parlament Ewropew għandu jsaħħaħ il-kapaċità tiegħu li jkollu rwol ewlieni f’demokrazija. Qal li ma jistax ikun li kull darba li tfeġġ emerġenza, iċ-ċittadini jistaqsu fejn hi l-Ewropa.

Sadanittant, il-Ministru tad-Difiża Ġermaniża Ursula von der Leyen, mill-grupp tal-Partit Popolari Ewropew, li ġiet nominata bħala l-ewwel mara biex tkun President tal-Kummissjoni Ewropea, vvjaġġat lejn Strasburgu għal taħditiet ma’ Ewroparlamentari li jridu jivvutaw dwar n-nomina tagħha fi żmien ġimagħtejn.

Hija trid tegħleb xi oġġezzjonijiet li hemm għan-nomina tagħha mill-Ewroparlamentari li jħossu li l-Parlament Ewropew irid jibqa’ jkollu sehem deċiżiv fl-għażliet tal-mexxejja tal-Istituzzjonijiet Ewropew li ġew nominati mill-mexxejja Ewropej fil-Kunsill.

Ara wkoll:

AĠĠORNAT (2): Ħadd mill-kandidati għall-President ma kiseb il-maġġoranza assoluta

Aħbarijiet Oħra
Ambjent

Il-Wasteserv bdiet il-proċess biex tkabbar il-faċilitajiet tagħha fil-Magħtab. Madwar għoxrin bidwi fl-inħawi li bejniethom għandhom madwar 250,000 metru kwadru ta’ raba’ ġew infurmati li l-Wasteserv qed tikkunsidra li tespropja din…

Kronaka

Raġel ta’ nazzjonalità barranija ġie arrestat wara li allegatament saq fuq uffiċjal tal-pulizija. L-inċident seħħ għall-ħabta tas-17:30 fl-akkwati ta’ Buġibba u ġie arrestat ftit tal-ħin wara fil-Mellieħa. Aktar dettalji fil-ħin…

Lokali

Il-kumpanija Steward Health Care Malta ppreżentat lill-Awtorita tal-Ippjanar applikazzjoni ta’ żvilupp għall-Isptar San Luqa biex fi kliemha jerġa’ jingħata l-ħajja bħala sptar modern li jinkludi aċċessibiltà aħjar għall-ispazji miftuħin u…

Għawdex

Għadha attiva ħafna fuq l-aġenda tal-gvern l-idea li Malta jkollha sistema ta’ metro, tant li l-Ministru Ian Borg ikkonferma ma’ TVM li l-istudju dwar dan jinsab fl-aħħar fażi tiegħu u…

Aktar