Qorti
Iwissi lid-direttur ta’ Kordin li jista’ jżommu responsabbli jekk żewġ nisa tqal jitilfu t-tarbija

Protest ġudizzjarju qed iwissi li d-direttur tal-Faċilità Korrettiva ta’ Kordin jista’ jinżamm responsabbli għal kumplikazzjonijiet li jistgħu jinqalgħu fit-tqala ta’ żewġ nisa Bulgari li qed iservu sentenza ta’ ħabs fuq serq.

L-avukat Etienne Calleja, li qed jidher għal Iliyana Kirilova Ilieva u Genoveva Stoilova, allega li dawn in-nisa tqal qed jinżammu f’kundizzjonijiet li mhumiex aċċettabbli.

Filwaqt li nnota li d-direttur tal-ħabs Alexander Dalli kien offra lin-nisa biex joqgħodu fil-librerija peress li attrezzata bl-arja kundizzjonata, il-protest sostna li dawn kellhom jinżammu l-isptar biex jieħdu l-kura li għandhom bżonn.

Intqal ukoll li waħda min-nisa, li t-tnejn qed iservu ħames xhur ħabs, kienet ilha 9 snin tipprova tinqabad tqila, u kien irnexxielha biss bis-saħħa tal-IVF. Għalhekk, jekk titlef it-tarbija, ma jkollhiex ċans ieħor biex terġa’ tinqabad tqila.