Annimali
Jgħidu li l-liġi ttellfilhom ħobżhom – kieku mhux għalihom iż-żwiemel inqatlu

Numru ta’ kuċċiera qalu li qegħdin jikkunsidraw li jiftħu kawża fil-Qorti biex ireġġgħu lura l-avviż legali li bih ma jistgħux jaħdmu bil-karrozzin bejn is-siegħa u l-erbgħa ta’ waranofsinhar f’Lulju u f’Awwissu. Waqt li l-avviż legali ntlaqa’ tajjeb mill-għaqdiet favur l-annimali, il-kuċċiera li tkellmu ma’ TVM qalu li dan qed jhedded l-għixien tagħhom għaliex huma l-aktar xahrejn u l-aktar ħinijiet li fihom ikollhom ix-xogħol.

Ix-xemx mgħajba li kellhna waranofsinhar kompliet żiedet il-frustrazzjoni tal-kuċċiera tal-karozzini li kellhom jirrifjutaw il-passiġġieri bejn is-siegħa u l-erbgħa ta’ waranofsinhar minħabba l-avviż legali li daħal fis-seħħ il-ġimgħa li għaddiet.

Ħdejn il-bieb tal-Imdina, il-kuċċiera lmentaw li r-regolamenti ġodda qatagħlhom saqajhom għax ma jistgħux jaħdmu meta l-aktar li jkollhom talba mit-turisti għas-servizz tagħhom.

”Dawn ix-xahrejn l-aqwa xahrejn tas-sena, ta’ tnax il-xahar, l-iktar li jkun hawn turisti…”

Il-kuċċiera sostnew li bejn is-siegħa u l-erbgħa ta’ waranofsinhar l-iktar ħin li jistgħu jdawru lira.

”It-turist x’ħin isiru l-erbgħa, tal-vapuri jitilqu biex jaħsbu għall-kumplament tal-cruise tagħhom, li qegħdin fil-lukandi, jaħsbu biex imorru jinħaslu u jbiddlu biex joħorġu filgħaxija ġifieri wara l-erbgħa, inti mhux ser tgħabbu nies, jien illum €35 qlajt.”

Il-kuċċiera fil-Belt sostnew li ftit ikunu l-vjaġġi u ż-żwiemel jilħqu jistru bejn vjaġġ u ieħor. Żied jgħid li bir-regoli l-ġodda probabbilment illum ma kienx ħa jagħmel vjaġġ wieħed.

”Bejn is-siegħa u l-erbgħa x’ser tibdew tagħmlu? Xejn, issa jdoqqu s-siegħa kulħadd imur f’postu u jmur lejn id-dar, ser toqgħod hawn sal-erbgħa tistenna? Ser ikolli mmur lejn id-dar għax mhux worth it noqgħod hawn nistenna għalxejn.”

Mistoqsija dwar is-saħħa taż-żwiemel, il-kuċċiera qalu li ż-żiemel jaħdem irid, b’kuċċier minnhom jgħid li kieku mhux għalihom dawn iż-żwiemel ilhom li nqatlu.

”Tliet kwarti miż-żwiemel li hawn bil-karozzini, dawn mhux tajbin għat-tiġrija għax ma jiġrux, xtrajnihom aħna tajbin għalina, għax kieku dawn qegħdin mejtin. Dak imisshom jgħidu l-animal lovers.”

Is-soluzzjoni li jaraw il-kuċċiera kontra l-abbuż taż-żwiemel huwa li jkun hemm uffiċjal mediku li jara jekk iż-żiemel mhux eżawrit.

”Iż-żiemel ibati, jurik li jbati, għandek sistema, ejja ħa nurik, meta ż-żiemel tagħmillu hekk u l-laħam idub, jerġa’ jiġi bħal ma kien, dak ikun żiemel li tista’ tużah il-ħin kollu. Jekk tibqa’ wieqfa, hemmhekk trid tieqaf.”

Il-kuċċiera qalu li qegħdin jikkunsidraw li jiftħu kawża biex ireġġgħu lura din id-deċiżjoni.

”Illejla għandhom laqgħa ma xi avukat, biex forsi ħa nifthu kawza, u aħna sakemm tinfetaħ il-kawża u sakemm jiġru dawn l-affarijiet, ser noqgħodu hekk, b’id wara u oħra quddiem.”

Aħbarijiet Oħra
Lokali

Waqt li hemm stennija għall-azzjonijiet li se jittieħdu mill-Gvern wara l-konsultazzjoni pubblika li saret fuq it-traffikar uman u l-prostituzzjoni, stħarriġ mill-programm INSIGHTS li jixxandar illejla fuq TVM, wera li l-prostituzzjoni…

Politika

Il-Kap tal-Oppożizzjoni u tal-Partit Nazzjonalista Adrian Delia qal li min qed jinvestiga l-qtil ta’ Daphne Caruana Galizia għandu jkollu l-kuraġġ jasal sal-aħħar għax warajh se jsib l-appoġġ u d-difiża ta’…

Agrikultura

Skola fiż-żona “Taż-Żokrija” fil-Mosta li tifforma parti mill-Kulleġġ Maria Reġina għandha ċentru mnejn toffri lill-istudenti fl-aħħar tliet snin tas-sekondarja tagħlim fuq l-agrikoltura u t-trobbija tal-annimali. Mifrux fuq erbat elef u…

Aktar