Lokali
Jirriċerkaw biex jibnu ajruplani aktar effiċjenti u siguri

Fl-Università ta’ Malta għaddej proġett ta’ riċerka dwar materjali ġodda li jistgħu jintużaw fil-bini tal-ajruplani biex jagħmluhom aktar effiċjenti u sikuri. Fl-istess ħin, bdoti u tekniċi li jaħdmu fl-industrija tat-tiswija tal-ajruplani, qed isegwu korsijiet universitarji biex jaġġornaw il-ħiliet tagħhom u jaddattawhom għal industrija li kull ma jmur qed tinbidel.

Magħmul minn pjanċi tal-ħadid u taħlita ta’ materjali oħra, biex ajruplan itir jinħtieġ li jkollu qafas ħafif biżżejjed li jagħtih iċ-ċans jinqata’ mill-art, iżda fl-istess ħin irid ikun b’saħħtu biex jiflaħ għall-istress kollu li jgħaddi minnu waqt it-titjira.

Il-Fakultà tal-Inġinerija fl-Università ta’ Malta qed tmexxi proġett li l-għan tiegħu huwa li toħloq materjali li jagħmlu l-ajruplani aktar effiċjenti u sikuri. Dr Glenn Cassar, Inġinier u Lettur fl-Università ta’ Malta, jgħid li s-sigurtà tal-ajruplani tibqa’ l-iprem priorità.

Dr Cassar qal li “qed niżviluppaw materjali composites, taħlita ta’ materjali li flimkien jgħinu biex iżidu l-performance tal-materjali. U l-istudenti tagħna jaħdmu u jittestjaw dawn il-materjali, jiżviluppawhom. U jaraw kif jistgħu jfallu. Kif jistgħu jtejbu l-performance ta’ aircraft u biex titjieb is-safety ta’ dawn l-ajruplani”.

Fil-laboratorju, il-materjali jiġu soġġetti għall-forzi qawwija f’magni apposta biex jaraw kemm jifilħu għal stress.

L-industrija tal-avjazzjoni qed tibbenefika mod ieħor mill-Università ta’ Malta hekk kif l-Istitut għat-Teknoloġiji Aerospazjali, li twaqqaf fl-2014, introduċa korsijiet ta’ aġġornament għall-bdoti u għat-tekniċi li jahdmu fit-tiswija tal-ajruplani. Il-Professur David Zammit Mangion jgħid li dawn il-korsijiet ta’ aġġornament huma meħtieġa mill-istess natura ta’ din l-industrija.

David Zammit Mangion qal li “qed ikun hemm aktar automation. Aktar komputers abbord. Ir-rwol tal-pilota qed jinbidel. It-taħriġ tagħhom mhux qed ikun sodisfaċenti dejjem. U qed jintilfu ċertu skills, jew mhux qed jiġu żviluppati ċertu skills fit-training programme.”

It-tekniċi li jaħdmu fl-industrija tat-tiswija tal-ajruplani, qed jiġu mħajra jattendu korsijiet ta’ aġġornament teoretiku fl-Università ta’ Malta biex isaħħu dak li tgħallmu fis-snin li għaddew fl-MCAST. Din is-sena 14-il tekniku, ħafna minnhom impjegati ta’ Lufthansa Technik u SR Techniks, qed isegwu dan il-kors.

Aħbarijiet Oħra
Lokali

Il-Kurja tal-Arċisqof tixtieq tavża li kull nhar ta’ Tnejn u nhar ta’ Erbgħa, l-Uffiċċju Żwigijiet ser ikun miftuħ bejn it-3pm u s-6pm. Fi stqarrija, l-Kurja qalet li l-Uffiċċju Żwiġijiet jiftaħ…

Lokali

Il-Korporazzjoni għas-Servizzi tal-Ilma ħabbret sensiela ta’ proġetti infrastrutturali ta’ aktar minn mitt miljun ewro li ser iżidu l-kwalità tal ilma, inaqqsu l-emissjonijiet, itejbu l-effiċjenza u jipproteġu l-ilma tal-pjan. Il-Kap Eżekuttiv…

Lokali

Christopher Bartolo li qed jiskonta sentenza ta’ ħames snin ħabs waqt li qed jirċievi kura intensiva minħabba kundizzjoni fil-kliewi, se jkollu jibqa’ jistenna biex il-Qorti tiddeċiedi jekk għandux jitħalla joħroġ…

Lokali

Il-Kap tal-Oppożizzjoni, Adrian Delia ppreżenta kawża fil-Prim Awla tal-Qorti Ċivili kontra l-Prim Ministru, l-Avukat Ġenerali, l-Awtorità tal-Artijiet, il-Malta Industrial Parks u l-Vitals Global Healthcare biex il-kuntratt bejn il-Gvern u l-VGH…

Aktar