Lokali
Jistaqsi għalfejn Liam Debono ma twaqqafx qabel

Filwaqt li ddeskriva l-każ ta’ nhar it-Tlieta li fih Kuntistabbli spiċċa jissielet għal ħajtu bħala “deplorabbli u xokkanti,” il-Professur Andrew Azzopardi qal li wieħed għandu jesplora kif iż-żagħżugħ Liam Debono, li jinsab akkużat bl-attentat ta’ qtil tal-pulizija, ma twaqqafx qabel, meta żgur li din l-imġieba kienet diġà dehret f’mumenti oħra.

Mistoqsi minn TVM jekk jaqbilx li l-każ ta’ nhar it-Tlieta huwa sintomu ta’ ġenerazzjoni nieqsa mir-rispett lejn l-awtoritajiet, id-Dekan għall-Fakultà għat-Tisħiħ tas-Soċjetà qal li hija sfortuna li inċident bħal dan qed jitfa’ dell ikrah fuq iż-żgħażagħ kollha.

“Iż-żgħażagħ fil-maġġoranza tagħhom huma persuni li jħobbu jgħixu u jagħmlu t-tajjeb. Iva jkollhom il-mumenti tagħhom minħabba t-transizzjonijiet li għaddejjin minnhom, imma dan ma jfissirx li jaslu għal din it-tip t’ imġieba,” qal Prof. Azzopardi.

“Huwa persuna li jkun neża’ minn kull sens ċiviku u uman” – Prof Azzopardi

Sostna li min jagħmel dak li jidher li seħħ lill-Kuntistabbli Schembri għandu problemi ulterjuri. “Huwa persuna li jkun neża’ minn kull sens ċiviku u uman… dan mhux ‘mindset’ taż-żgħażagħ, dan huwa ‘mindset’ ta’ żagħżugħ li jixraqlu li jkun ġustizzjat u fl-istess ħin mogħti għajnuna terapewtika.”

Il-Professur Azzopardi ma eskludiex li fost iż-żgħażagħ seta’ naqas ir-rispett lejn l-awtorità, iżda saħaq li dan ma jfissirx li jkun hemm attentati ta’ qtil u inċidenti bħal dawn. Qal li iktar iħoss li hemm nuqqas ta’ biża’ mill-awtoritajiet, kif ukoll il-fatt li ż-żgħażagħ huma aktar emanċipati jġiegħlhom jistaqsu akar u joqgħodu anqas għall-kontroll tal-kbar.

Tenna iżda li dak li jidher li għamel dan iż-żagħżugħ huwa att ta’ bniedem wieħed u ma jaċċettax li din hija xi attitudni li tara mill-maġġoranza taż-żgħażagħ. “Il-maġġoranza taż-żgħażagħ interessati fl-isport, fl-qasam filantropiku, fir-relazzjonijet, fil-ħruġ, fi sport, fi ħbiberiji u f’ imġiba pożittiva,” temm jgħid Prof. Azzopardi.

Aħbarijiet Oħra
Budget

Għada se jitħabbar it-tieni budget ta’ din il-leġislatura mill-Ministru tal-Finanzi Edward Scicluna. Filmat imxerred fuq il-mezzi soċjali ġie spjegat l-għan tal-Budget, li jgħolli l-kwalità tas-servizzi li joffri l-Gvern fosthom dawk tas-saħħa…

Ikel

Ħafna jiħduh bħala duwa meta jkollhom uġigħ fi griżmejhom jew għal taqlib fl-istonku, oħrajn iżiduh mal-kafè jew mat-te. Qed nirreferu għall-ġulepp tal-ħarrub li jissajjar bħal daż-żmien, hekk kif tibda toqrob…

Ġurnali

Ħarsa lejn l-istejjer ewlenin fil-ġurnali tal-lum The Sunday Times Fuq il-faċċata storja b’ritratt li tgħid li bini tal-Gvern fi Xrobb l-Għaġin li qabel kien jintuża mill-ex Prim Ministru Dom Mintoff…

Aktar