Saħħa
Jistenna b’ħerqa x-xogħlijiet fit-tieni dar residenzjali għal pazjenti bl-ALS

Mistenni jibda x-xahar id-dieħel ix-xogħol ta’ twaqqiegħ u tħammil għat-tieni dar residenzjali għal persuni bil-marda newroloġika tal-ALS. Il-proġett, f’Ħaż-Żebbuġ, mistenni jiswa sitt miljun Ewro.

Ma’ TVM, il-fundatur tal-Fondazzjoni ALS Malta, Bjorn Formosa, jgħid li kull ġurnata hi rebħa għalih, anke jekk b’ħafna tbatija.

”L-unika mod huwa, kemm jista’ jkun… tagħmel kuraġġ… u aħna rridu nbiddlu dawn id-diffikultajiet u dawn it-tbatijiet f’affarijiet pożittivi biex kemm jista’ jkun, inkunu nistgħu ngħinu nies oħra… dak huwa l-messaġġ tiegħi għal dan iż-żmien tas-sena.”

Bjorn Formosa qed jipprova jbiddel it-tbatija personali tiegħu f’tama għal dawk li qed isofru mill-kundizzjoni tal-ALS.

Din il-missjoni wettaqha diġà b’bosta inizjattivi fosthom il-proġett ta’ dar residenzjali f’Ħal Qormi għal pazjenti bil-kundizzjoni tal-ALS.

”Hawn tlettax-il persuna jgħixu hawn, però għandna waiting list li llum il-ġurnata lanqas biss nistgħu ngħodduha… illum żdiedu ħafna d-domanda ta’ nies li għandhom bżonn din l-għajnuna.”

Bjorn qed jaħdem biex iwettaq ħolma akbar, proprjetà f’Ħaż-Żebbuġ li se tkun it-tieni dar residenzjali għal dawk bl-ALS. Il-proġett jirrikjedi investiment ta’ sitt miljun ewro.

”Il-post xtrajnih, jekk Alla jrid issa x-xahar li jmiss jibda l-proġett ta twaqqiegħ u eskavazzjoni tal-post il-ġdid u ovvjament minn hemmhekk biex ilestu l-proġett fadal triq twila u ammont ta’ fondi biex il-proġett jitlesta kemm jista’ jkun malajr.”

L-akbar sodisfazzjon għal Bjorn Formosa hu li minkejja d-diffikultajiet personali, minn meta fl-età ta’ 28 sena sar jaf li għandu l-ALS kiber ħafna l-għarfien dwar din il-kundizzjoni. Dan seħħ fost l-oħrajn bit-twaqqif ta’ fondazzjoni li qed tkun ta’ spalla għall-persuni b’din il-kundizzjoni. Għal Bjorn iżda, l-iżjed fattur li jimlilu qalbu b’kuraġġ kien il-progress fir-riċerka dwar l-ALS, li jittama twassal għal kura effettiva.

“Mindu bdejna bl-ALS, illum il-ġurnata l-affarijiet inbidlu ħafna, qabel ma kien hawn xejn u illum kemm jista’ jkun intuhom kemm jista’ jkun assistenza u nagħmlulhom ħajjithom faċli kemm jista’ jkun, l-iżviluppi fil-qasam tar-riċerka tjiebu wkoll, u jekk Alla jrid fis-snin li ġejjin jista’ jkollna kemm jista’ jkun titjib biex dak li jkun jgħix ħajja aħjar.”

Aħbarijiet Oħra
Lokali

L-Għaqda Inħobbu l-Gżira, li hija vuċi kontra l-iżvilupp fuq Manoel Island, qalet li minkejja l-petizzjoni li ressqet quddiem il-Kumitat tal-Petizzjonijiet bi 8,487 firma, din għadha ma ġietx diskussa fil-Parlament. Fi stqarrija qalet…

Lokali

Il-Gvern fi stqarrija ċaħad rapporti li xxandru fuq mezzi oħrajn tax-xandir u li anke ġew kwotati minn xi membri tal-Oppożizzjoni, dwar żidiet fil-pagi tal-membri tal-Kabinett. Fl-istqarrija l-Gvern qal li dawn…

Għawdex

Ċifri li kiseb TVM juru li nhar Santa Marija, il-kumpanija Gozo Channel operat mad-90 vjaġġ, żieda ta’ 14-il vjaġġ fuq l-istess jum is-sena l-oħra. B’kollox nhar il-Ħamis qasmu lejn Għawdex…

Aktar