Kunsilli Lokali
Jitfakkar il-25 anniversarju mit-twaqqif tal-Kunsilli Lokali f’Malta b’musical

Ittieħdu diversi inizjattivi biex jitfakkar il-25 anniversarju mit-twaqqif tal-Kunsilli Lokali f’Malta. Il-Kunsill Lokali tal-Mellieħa ħareġ b’idea oriġinali, dik li jtella’ musical. Wara sitt xhur ta’ xogħol, il-musical “Naħal tal-Imħabba” ttella’ fi tmiem din il-ġimgħa u se jibqa’ rikordju ta’ ħafna kliem bid-djalett li qed jintilef.

Ambjentat fil-Mellieħa fejn Viktor, żagħżugħ Mellieħi ffissat fuq id-drone, imur iżur lil nanntu fid-dar residenzjali Madonna tal-Mellieħa.

Fid-dar, taħdem l-infermiera Fatima, refuġjata li trabbiet fil-lokalità u Viktor jinġibed lejha minkejja li hu għarus lil Sara.

L-Awtur Paul P. Borg spjega li “tixtieq l-imħabba tiegħu, però ma tridx li tweġġgħu. Sadanitant hu ma jridx iweġġa’ lanqas il-qalb ta’ dik it-tfajla Melliħija.”

Il-Kompożitur Philip Vella qal “xalata ta’ lirika li minnu kelli ċans nagħżel biex nibni l-mużika adattata għalih, u kien pjaċir kbir anzi għalija li nagħmluh dan.”

B’kompożizzjoni ta’ Philip Vella u kliem ta’ Paul P. Borg, għas-Sindku tal-Mellieħa John Buttigieg, il-musical se jkun wirt għall-ġenerazzjonijiet fil-ġejjieni.

Is-Sindku tal-Mellieħa, John Buttigieg qal “bis-saħħa ta’ dan il-musical, ħafna mill-kliem Malti speċjalment kliem bid-djalett Mellieħi, se jibqa’ rikordju.”

L-isem Mellieħa nibet mill-kliem melħ u għasel u għalhekk, il-musical jismu “Naħal tal-Imħabba”. In-naħal għandhom irwol importanti fil-produzzjoni u fost oħrajn huma responsabbli biex idakkru l-imħabba bejn Viktor u Fatima.

B’direzzjoni ta’ Giovann Attard, il-musical “Naħal tal-Imħabba” ġie ppreżentat fl-okkażjoni tal-25 anniversarju mit-twaqqif tal-Kunsilli Lokali f’Malta.

Aħbarijiet Oħra
Lokali

“Għajnu Aħmar it-Tonn” jew “It-Tonn tal-Melliħin” kienet l-għajta tas-sajjieda Melliħin li sal-bidu tas-sittinijiet kienu jbiegħu t-tonn li jaqbdu bit-Tunnara. Is-sajd bit-tunnara nqata’ iżda fil-mużew tat-Tunnara fil-bajja tal-Mellieħa, għaqda volontarja Melliħija ikkonservat…

Pulizija

Fl-aħħar xahrejn, l-uċuħ ta’ erba’ Pulizija saru familjari mal-komunità tal-Mellieħa. Ir-residenti laqgħuhom u jqisuhom “ta’ ġewwa”. Dawn l-erba’ uffiċċjali jiffurmaw l-ewwel Community Policing Team fi proġett pilota mniedi mill-Korp. Intervistat…

Malta

Fil-Greċja, hemm madwar 3,500 persuna b’konnessjonijiet Maltin, il-maġġoranza f’Korfu fejn jgħixu Griegi b’nisel Malti li saħansitra jwasslu sar-raba’ u l-ħames ġenerazzjoni. Waqt żjara fil-Greċja, il-President George Vella ltaqa’ ma’ rappreżentanti…

Kisbiet

Imwieled Malta u emigra lejn l-Awstralja 44 sena ilu wara li gradwa mill-Università ta’ Malta dak iż-żmien kienet magħrufa bħala The Royal University of Malta. F’intervista ma’ TVM, il-Professur Stephen…

Aktar