Barranin
Jitħalla jżur il-qabar ta’ qrabatu f’Bergamo wara xahrejn midfuna

Fiċ-ċimiterju ta’ Nembro, raħal li ftit ġimgħat ilu kien fl-epiċentru tal-pandemija fl-Italja, qabar wara l-ieħor hu mmarkat biss b’salib tal-injam. Imwaħħal miegħu, kartellun bl-isem, ritratt żgħir u d-dati tat-twelid u l-mewt tal-persuna midfuna… kollha f’Marzu u April 2020.

Fl-ewwel 21 jum ta’ Marzu, ir-rata ta’ imwiet f’dan ir-raħal fil-provinċja ta’ Bergamo żdiedet minn 16-il mewt kuljum kif kienet sa sena qabel, għal 116.

Mill-bidu tal-pandemija, f’Bergamo mietu 3,000 persuna. Tlieta minnhom kienu qraba ta’ Livio Giovanelli, li tilef żewġ zijiet u kuġin. “Dan ħalliena f’paniku totali għax kienet sitwazzjoni li seħħet wisq mgħaġġla u ma stajna nagħmlu xejn,” qal Livio Giovanelli.

Minkejja li għaddew kważi xahrejn mill-mewt ta’ qrabatu, Livio seta jmur ipoġġi l-fjuri fuq l-oqbra tagħhom il-ġimgħa l-oħra, wara li tneħħew xi restrizzjonijiet.

Mindu faqqa’ l-ewwel każ ta’ Coronavirus, l-isptarijiet ma setgħux ilaħqu mal-pazjenti u filmati tat-tkexkix tat-trakkijiet tal-armata jġorru l-mejta sar simbolu tal-pjaga li ħalliet il-pandemija.

Il-kap tat-taqsima tal-emerġenza tal-isptar Papa Giovanni, Roberto Cosentini, qal li għall-bidu ma setgħux ilaħqu mal-pazjenti, iżda maż-żmien adattaw għas-sitwazzjoni. “Il-problema li nara hi l-emozzjonijiet tagħna, għax aħna għajjenin. Allura nibża’ li mewġa oħra kbira tkun ħafna iktar iebsa għalina mill-ewwel waħda, f’dik li hija saħħa mentali.”

It-Taljani qed jaffaċjaw ukoll għawġ ekonomiku wara diversi ġimgħat bin-negozji magħluqa.

Is-Sindku ta’ Bergamo, Giorgio Gori, qal li jeħtieġ tingħata spinta biex jinbena kollox mill-ġdid kif sar wara t-tieni gwerra dinija. Stqarr li bħalma din il-provinċja kienet is-simbolu tal-pandemija, jeħtieġ tkun is-simbolu ta’ tama u qawmien mill-ġdid.

Dan kien rifless fil-kandidatura ta’ Bergamo ma’ Brescia biex tliet snin oħra jkollha t-titlu tal-belt Taljana tal-Kultura, bit-tama taż-żewġt ibliet fil-Lombardia tkun li din terġa tagħti spinta lill-komunità li għaddiet mill-aktar mumenti mudlama.

Aħbarijiet Oħra
Barranin

Air France għandha pjani li tissensja 7,500 ħaddiem minħabba li ntlaqtet ħażin mill-coronavirus. Fi stqarrija l-Air France qalet li jidher li l-irkupru mid-daqqa li ħadet il-kumpanija se jkun bil-mod ħafna…

Barranin

Fl-Ingilterra reġgħu fetħu l-pubs, ristoranti, hairdressers u s-swali taċ-ċinema filwaqt li persuni minn żewġ residenzi separati jistgħu jiltaqgħu għand xulxin hekk kif komplew jintreħew il-miżuri tal-Covid-19. Diversi kienu l-klijenti li…

COVID-19

Għall-ewwel darba minn Marzu l’hawn mindu feġġ l-ewwel każ ta’ coronavirus f’Malta, l-ebda pazjent bil-virus mhu qed jingħata kura fl-isptar Mater Dei. Fl-aġġornament ta’ kuljum kmieni waranofsinhar, l-awtoritajiet tas-saħħa qalu…

Barranin

Qorti Franċiża ordnat inkjesta dwar il-mod kif il-gvern ittratta r-rispons għall-firxa tal-coronavirus bl-investigazzjoni tiffoka fuq l-ex prim ministru Edouard Philippe. Dan sar wara lmenti li saru minn unions u tobba…

Aktar