Festi
AĠĠORNAT: Jitħassru l-festi esterni ta’ Santu Wistin fil-Belt Valletta

Iċ-ċelebrazzjonijiet esterni tal-festa ta’ Santu Wistin fil-Belt tħassru fid-dawl tal-każ tal-Kappillan tal-istess parroċċa, Patri Deo Debono, li qed jiġi implikat fis-serqa ta’ arti sagra b’valur ta’ aktar minn €80,000.

Fi stqarrija, il-provinċja Agostinjana Maltija appellat lil kulħadd biex iħalli jissuktaw l-investigazzjonijiet tal-pulizija u l-proċeduri fil-qrati. Waqt li Patri Deo Debono jinsab fuq police bail u mistenni jitressaq il-Qorti l-ġimgħa d-dieħla, sorsi qrib il-Pulizija qalu li l-investigazzjoni qed tħares ukoll lejn il-mottiv għall-allegat serq u negozju ta’ patrimonju ekkleżjastiku.

Il-Ħamis filgħodu Triq ir-Repubblika fil-Belt kienet imżejna bil-pavaljuni. L-istess, il-qalba tal-parroċċa Agostinjana, li fi tmiem din il-ġimgħa tiċċelebra l-festa ta’ Santu Wistin.

Madanakollu l-ispirtu ċelebrattiv fost il-komunità Agostinjana kien nieqes. Mal-għodwa, il-kelma li l-festa ta’ barra kienet se titħassar ġriet fost il-parruċċani.

Ma’ Television Malta, il-Provinċjal tal-Agostinjani, Fr Leslie Gatt, spjega li mhux opportun li jsiru ċ-ċelebrazzjonijiet esterni.

“Fiċ-ċirkostanzi ta’ dak li ħareġ ilbieraħ iltqajna u kkonsultajna flimkien diversi stakeholders, anke relatati mal-festa, u ħassejna li ma jkunx hemm l-ispirtu adattat li nibqgħu għaddejjin bil-festi esterni. Ser nagħmlu ċ-ċelebrazzjoniiet li jsiru fil-knisja, illejla u għada jsir it-Tridu u is-Sibt il-quddies filgħaxija.”

Id-deċiżjoni ssegwi l-aħbar li Patri Deo Debono, li kien il-Kappillan tal-parroċċa, mistenni jitressaq il-qorti fil-bidu tal-ġimgħa d-dieħla implikat b’serq u kummerċ illegali ta’ kwadri u xogħol ta’ patrimonju ekkleżjastiku mill-kunvent tal-istess ordni fil-Belt, u ta’ oġġetti minn monasteru tas-sorijiet.

L-Arċisqof ordna li Patri Deo Debono ma jibqax Kappillan, u waqqfu milli jqaddes fil-pubbliku. Minnufih l-ewwel sinjali ta’ sfrattu tal-festa. Marċ u programm mużikali li kellhom isiru l-Erbgħa filgħaxija minn banda mistiedna tħassru, meta l-banda kienet lesta biex tibda s-servizz. Sorsu qalu li fiċ-ċirkustanzi l-banda li kienet mistiedna għall-ewwel darba f’din il-festa talbet ħlas bil-quddiem, li ma ngħatax.

Il-parruċċani għażlu li jżommu fommhom sieket mal-mikrofonu ta’ TVM. Oħrajn esprimew dieqa għall-aħbar li Patri Deo tneħħa minn Kappillan. Dilettanti tal-festi kkummentaw li fl-aħħar ħames snin din il-festa kibret ħafna. Bħala baned biss, fil-ġimgħa tal-festa kienu mistiedna tnax-il banda barranija. Television Malta staqsa lill-Provinċjal dwar l-infiq tal-festa u rapporti li din il-parroċċa waqgħet lura f’xi ħlasijiet. Fr Leslie Gatt wieġeb li l-provinċja se tieħu l-passi tagħha fiż-żmien opportun.

“F’dan l-istadju hemm proċess li tagħmlu l-pulizija u ma jkunx opportun li nikkummenta aktar fuq dak li qed jingħad. Fl-istqarrija rrakkomandajna aktar li nirrispettaw il-proċess li għandu jgħaddi u ma naslux għal konklużjonijiet bla bżonn.”

Sadanittant, għaż-żmien li ġej, il-parroċċa ta’ Santu Wistin se titmexxa minn Patri Żaren Saliba bħala Aġent Kappillan.

Ara wkoll:

Kappillan fil-Belt se jitressaq il-Qorti implikat fis-serqa ta’ arti sagra b’valur ta’ €80,000

L-Arċisqof ineħħi lil Patri Deo Debono minn Kappillan tal-Parroċċa ta’ Santu Wistin

Aħbarijiet Oħra
Ambjent

Żona li fiha daqs seba’ grawnds tal-futbol, li minn wied naturali nbidlet f’miżbla, qed tingħata wiċċ ġdid biex minflok tibqa’ ġerħa fin-naħa t’isfel ta’ Malta, issir attrazzjoni. Sa wieħed u…

Kultura

Infrastructure Malta appik li tibda operazzjoni delikata, biex taqla’ sħiħ mill-blat qabar tal-perjodu Puniku-Ruman, u tpoġġih fil-ġenb ta’ triq ġdida li qed tibni f’Ħ’Attard. B’hekk din is-sejba ta’ valur arkeoloġiku,…

Immigrazzjoni

TVM jinsab infurmat li matul il-lejl li għadda, grupp ta’ madwar 90 immigrant li ġew salvati fil-Mediterran fiż-żona ta’ tiftix u salvataġġ ta’ Malta ttieħdu fuq vapur tal-Captain Morgan li…

COVID-19

Il-pandemija u r-reħi tar-restrizzjonijiet ġabu magħhom l-użu tal-maskra. Filwaqt li ħafna qed jużawha kif obbligati jagħmlu f’ħafna postijiet pubbliċi, osservajna li bosta qed jilbsu biex taparsi libsuha. Id-Direttur tad-Direttorat tal-Promozzjoni…

Aktar