Barranin
ARA: Jitqatlu biex jieħdu ritratt mal-funtana u jispiċċaw arrestati

Żewġ nisa spiċċaw jitqatlu bejniethom biex jieħdu ritratt mal-monument ikoniku ta’ Fontana di Trevi fil-kapitali Taljana ta’ Ruma.  Magħhom ingħaqdu l-familji rispettivi tagħhom biex b’hekk minn diżgwit saħnet il-qiegħa tant li żvolġiet fi ġlieda.

Kollox beda meta turista Olandiża ta’ 19-il sena u oħra Italo-Amerikana ta’ 44 sena riedu jieħdu selfie minn angolatura partikolari biex iġibu tajjeb lil Fontana di Trevi warajhom.  Ħadd minnhom ma ried iċedi biex jersaq ftit u bdew jgħajru u jinsulentaw lil xulxin.  Mal-ħin, kellhom jissejħu l-Pulizija biex forsi jikkalmaw is-sitwazzjoni, iżda minflok kompliet tagħqad iktar meta ġew fl-idejn u ndaħlu l-familjari.

B’kollox ġew arrestati 8 persuni, fosthom 3 tfajliet taħt l-età – tnejn minnhom Amerikani ta’ 17-il sena u waħda Olandiża ta’ 13-il sena.  It-turisti ġew arrestati fuq vjolenza u theddid.

Ara dan il-filmat li tpoġġa fuq is-siti soċjali ftit wara li seħħet il-ġlieda.