Trasport
Jiżdiedu aktar miżuri fuq persuni li jidħlu Malta bil-katamaran

Minn din il-ġimgħa, iddaħħlet miżuri ġdida għal persuni li jivjaġġaw bil-katamaran biex iwasslu lejn il-pajjiż, servizzi essenzjali jew għal raġunijiet umanitarji.

Fil-bulettin mediku tal-lum, is-Supretendent tas-Saħħa Pubblika, il-Professur Charmaine Gauci qalet li l-projbizzjoni fuq l-ivvjaġġar għadha fis-seħħ u l-uniċi persuni li jistgħu jidħlu fil-pajjiż minn barra huma dawk relatati ma’ servizzi essenzjali li jridu permess biex jidħlu u sitwazzjonijiet umanitarji.

Qalet li sa mill-bidu tal-imxija kienu jittieħdu miżuri ta’ prekawzjoni li jsir test qabel ma’ jiġu Malta u ieħor malli jaslu Malta. Kompliet tgħid li minn din il-ġimgħa dawn il-persuni bdew jinżammu wkoll fi kwarantina u jsir test ieħor wara li jgħaddi l-perjodu ta’ kwarantina.

Il-Professur Gauci qalet li dan qed isir biex l-awtoritajiet Maltin ikomplu jsaħħu l-ittestjar u fl-istess waqt jikkontrollaw is-sitwazzjoni f’dan il-mument ta’ transizzjoni li għaddej minnu l-pajjiż waqt il-pandemija Covid-19.