Kurżitajiet
Kienet f’xifer li ttemm ħajjitha sakemm irrealizzat kemm tħobb il-kelb tagħha

L-imħabba bla kundizzjoni bejn il-kelb u sidu wasslet biex mara salvat minn ħalq il-mewt grazzi għal intervent f’waqtu mill-kelb tagħha.  Il-mara ta’ 58 sena kienet se taqbeż mill-ħames sular ta’ blokk t’appartamenti fejn tgħix, iżda l-kelb irnexxielu jbiddlilha fehemtha.

Hija kienet diġà ċemplet in-numru t’emerġenza 112 biex tgħidilhom x’kienet bi ħsiebha tagħmel, bl-uffiċċjali kienu pronti jgħadduha ma’ suldat li qagħad ikellimha għal madwar siegħa fuq it-telefown sakemm qaltlu li kienet trabbi kelb li tqisu daqs li kieku kien binha u malli daħal fix-xena l-kelb iddeċidiet li ma tagħmilx suwiċidju.

Is-suldat beda jipponta fuq l-imħabba li għandha għall-kelb u kemm kien se jbati li kieku hija tmut għax ikollu jsib dar oħra jew jittieħed għand xi organizzazzjoni li tieħu ħsieb l-annimali abbandunati sakemm jiġi adottat minn xi ħaddieħor.  Kien f’dak il-mument li l-mara fehmet l-iżball li kienet se tagħmel.

Fl-istess waqt il-Pulizija rnexxielhom jintraċċawha, marru jsibuha f’darha, f’Turin, u ħaduha l-isptar San Giovanni Bosco biex jagħtuha l-kura meħtieġa.