Lokali
Kif jiġi trattat l-iskart organiku? – 500 tunnellata ta’ skart organiku miġbura kull ġimgħa

L-iskart organiku li beda jinġabar fl-aħħar xahar u nofs diġà qed jiġġenera l-enerġija daqskemm tintuża minn aktar minn 6,000 familja. Iċ-Chairman tal-Wasteserv David Borg qal lil TVM li l-iskema tal-ġbir tal-iskart organiku marret aħjar milli kien mistenni tant li kull ġimgħa qed jinġabru mal-500 tunnellata ta’ dan l-iskart.

Kważi xahar u nofs wara li daħlet fis-seħħ b’mod obbligatorju s-sistema tas-separazzjoni tal-iskart organiku, krew ta’ TVM ra l-proċess ta’ kif qed jiġi ttrattat l-iskart organiku li qed jinġabar kull nhar ta’ Tnejn, l-Erbgħa u l-Ġimgħa.

Waqt li l-familji issa draw l-ġranet meta tinġabar l-borza l-bajda bl-iskart organiku, ftit huma li jafu x’jiġri mill-iskart miġbura minn wara l-bibien tagħhom.

It-trakkijiet bil-boroż il-bojod miġbura mill-ibliet u l-irħula jitbattlu f’maħżen magħluq biex il-materjal ma jrejjaħx. Magni bi xfafar iqattgħu l-boroż li ntgħażlu għalihom waqt li l-materjal organiku mill-kċejjen Maltin jgħaddi minn għarbiel biex isir likwidu. Hawnhekk isir it-trattament bijoloġiku biex minnu jinħareġ il-gass, waqt l-likwidu li jibqa’ jiġi seperat minn dak solidu li jitnixxef biex jinbidel f’kompost għall-ħamrija.

Iċ-Chairman tal-Wasteserv David Borg qal “minn borża organika tiġi trasferita għal elettriku lura fil-grid li huwa kollu green energy. Qed jinfurmawni li issa laħħaqna għal ekwivalenti ta’ 6,500 dar fis-sena”

David Borg waqt li spjega li bil-materjal li dieħel aktar minn irdopja l-ammont ta’ enerġija nadifa li qed tkun iġġenerata mill-iskart organiku. Huwa stqarr li l-wasteserv hija sodisfatt li l-familji qed jagħmlu parti tagħhom tant li nqabżu l-miri għax f’Novembru, inġabar medja ta’ 12-il kilo skart organiku minn kull dar li qabel kien jispiċċa fil-landfill.

David qal “qed nirċievu mal-500 tunnellata fil-ġimgħa fejn aħna konna qed nistennew massimu ta’ 300 tunnellata fil-ġimgħa.”

Davina Shead, li hija responsabbli mill-proġetti tal-Wasteserv qalet li l-wasteserv qed tkompli bit-tqassim ta’ kontenituri għas-seperazzjoni tal-iskart.

Davina qalet “sar investiment ta’ ‘l fuq minn €5 miljun biex nipprovdu kull residenza bil-kontenituri apposta bis-separazzjoni tal-iskart.”

Sadanittant, il-kumitat Parlamentari għall-ambjent kompla jiddiskuti l-pass li jmiss fl-immaniġġjar tal-iskart biex isir l-investiment li biex l-bqija tal-iskart li bħalissa tmur fil-landfill tkun tista’ tinbidel f’enerġija. Dal-proġett b’investiment ta’ aktar minn mitt miljun Ewro mistenni jitlesta fil-leġislatura li jmiss.

Aħbarijiet Oħra
Lokali

Il-President George Vella qal li għandu riservi serji dwar il-legalizzazzjoni tal-marijuana rikreattiva. F’konferenza tal-Fondazzjoni Oasi, il-President stqarr li l-kannabis tista’ tkun ta’ benefiċċju għal skop mediku, iżda appella għal kawtela…

Lokali

Fil-Bajja tal-Balluta, bdiet tintuża teknoloġija ġdida biex ir-ramel minn qiegħ il-baħar jittella’ biex terġa’ tifforma l-bajja ramlija. Sandro Gatt, li huwa responsabbli mill-proġett f’isem il-Grupp Polidano, spjega lil TVM li…

Edukazzjoni

Wara li l-Ministeru għamel konsultazzjoni pubblika fuq l-uniformi tal-iskola mal-istudenti, l-għalliema u l-ġenituri, l-għażla tal-maġġoranza fost kull grupp kienet favur li l-uniformi tkun tracksuit komda u ta’ kwalità, inklużi poloshirt,…

Lokali

Pierre Portelli dar għall-mezzi soċjali u kiteb li l-Membru Parlamentari Nazzjonalista Karol Aquilina akkumpanja lil Manuel Delia l-Qorti fil-każ li għandu kontra l-midja tal-Partit Nazzjonalista. Dalgħodu fil-qorti kompliet il-kawża li…

Aktar