Saħħa
“Kont nisma’ qisha banda f’widnejja” – raġel li ilu 40 sena bit-Tinnitus

Timmaġinak tisma’ kontinwament tisfir jew ħsejjes tal-banda f’widnejk?

Din l-esperjenza jafha sew Ivan Carabott li ilu minn tfulitu jbati b’nuqqas ta’ smigħ. Madankollu, kien jisma’ ħsejjes ġejjin mill-moħħ f’kundizzjoni li medikament hi magħrufa bħala Tinnitus.

Il-kundizzjoni mhijiex rari u jidher li tolqot bosta nies, l-aktar dawk li jkunu esposti għall-istorbju.

Ta’ 7 snin, bħal sajjetta fil-bnazzi Ivan Sammut tilef is-smigħ minn widna waħda.

”Qomt filgħodu u litteralment ma kontx qed nisma’ minn din il-widna u bqajt għaddej b’ħajti għax ma stajt nagħmel xejn minħabba li kien total hearing loss.”

6 snin wara, tilef is-smigħ mill-oħra.

Ġrali l-istess f’din il-widna wkoll jiġifieri f’daqqa waħda ma nisma’ xejn.

Stramba kemm hi stramba . . . Ivan beda jisma’ bħal qisu tisfir f’widnejh.

”Ħsibt li kienet xi ħaġa madwari. Imbagħad indunajt li kienet ġejja mill-parti ta’ ġewwa ta’ rasi jiġifieri ġo rasi l-ħoss li kien.”

It-tobba qalulu li għandu t-Tinnitus . . . sintomu li fil-każ tiegħu kien ikkawżat min-nuqqas ta’ smigħ.

”Kont nisma’ qisha banda għaddejja f’rasi u kont litteralment f’punt f’ħajti fejn ridt insabbat rasi ma’ ħajt. Tħossok qed tiġġennen.”

Il-ħsejjes f’widnejh ivarjaw skont il-burdata.

”Meta nkun irrabjat, għajjien. Jiddependi fuq ħafna fatturi imma ħoss konsistenti. Ma tgħaddix sekonda li ma tisimgħux.”

Biex itaffi l-effetti tat-Tinnitus, Ivan għamel operazzjoni u waħħlulu apparat ma’ widnejh . . . iżda xorta jkun hemm drabi fejn il-ħsejjes ma jkunx jista’ jissaportihom.

”Ili 40 sena b’dan it-tifsir f’widnejja u fil-bidu kont ngħid kif se nidraha? Imma trid taċċetta l-fatt li hi parti mill-kundizzjoni li għandek fil-każ tiegħi ta’ nuqqas ta’ smigħ.”

F’kummenti lil TVM, l-Ispeċjalista tas-Smigħ, Andrew Sciberras spjega li t-Tinnitus ma tolqotx biss nies li tilfu s-smigħ.

”Tinnitus mhijiex problema fil-widna imma fil-moħħ u essaċċ mhijiex problema. It’s a symptom of something jiġifieri n-nuqqas ta’ smigħ, tension, depression, stress. Dawk kollha jikkawżaw it-Tinnitus” qal Dr Sciberras.

Dr Sciberras qal li t-Tinnitus tolqot faxex differenti ta’ nies.

”Dan l-aħħar qed nara aktar żgħażagħ li għandhom problema ta’ Tinnitus. Jekk sejjer festival. Fis-sajf ikun hemm ħafna kunċerti. Uża ear protection. M’hemm xejn ħażin.”

”Nies li jaħdmu f’fabbriki fejn hemm ċertu storbju jiġifieri kull tip ta’ storbju hu ħażin u ċ-ċans hi li se jżidlek il-problema tan-nuqqas ta’ smigħ li jiġi problema ta’ Tinnitus.”

It-Tinnitus ma titfejjaqx.

”Ħafna drabi l-hearing aids jgħinu jiġifieri jekk għandek nuqqas ta’ smigħ u tagħmel hearing aid, iċ-ċans hu li se tnaqqas it-Tinnitus. Ma tneħħihiex, tnaqqasha.”

Dr Sciberras appella lil min għandu xi diffikultà fis-smigħ biex jagħmel test tas-smigħ darba fis-sena.

Aħbarijiet Oħra
Infrastruttura

Il-Korporazzjoni għas-Servizzi tal-Ilma minn għada se tibda tiswijiet fis-sistema ta’ katusi f’qiegħ il-baħar li jintuża għar-rimi ta’ drenaġġ trattat mill-impjant ta’ Għawdex. Il-ħidma delikata li għandha tieħu madwar tliet ġimgħat…

Kronaka

Raġel ta’ 33 sena weġġa’ gravi f’inċident bil-mutur f’Birkirkara. Il-Pulizija kienet infurmata bl-inċident fi Triq il-Wied għall-ħabta tal-4.45pm. Fi stqarrija l-Pulizija qalet li s-sewwieq, li jgħix il-Pietà, kien qed isuq…

Saħħa

F’Malta hawn madwar 7,000 persuna li għandhom id-demenzja, bl-istudji juru li l-għadd mistenni jiżdied għal mill-inqas 13,000 sal-2050. L-esperti jemmnu li din hija biss ix-xifer tal-istampa, minħabba li għadd ta’…

Stejjer Umani

Għalkemm il-Maltin ikunu qed jistennew is-sajf bil-ħerqa biex jaqtgħu xi ftit mir-rutina ta’ kuljum tax-xogħol, mhux l-istess jista’ jingħad għal Alfred Attard li ilu aktar minn 40 sena jiġbor il-melħ…

Aktar