Politika
L-AD se tpoġġi l-kwalità tal-ħajja fiċ-ċentru tal-ħidma tagħha fil-Kunsilli Lokali

Alternattiva Demokratika qalet li hija tpoġġi l-kwalità tal-ħajja tar-residenti u tat-turisti fiċ-ċentru tal-ħidma tagħha fil-Kunsilli Lokali.

F’konferenza tal-aħbarijiet f’San Ġiljan, iċ-chairman tal-Alternattiva Demokratika Carmel Cacopardo qal li l-Kunsill għandu jingħata aktar rispett billi jkun assigurat li jaħdem id f’id ma’ Infrastructure Malta. Żied li l-bankini m’għandhomx jibqgħu għan-negozju imma għandhom isiru għan-nies. L-Alternattiva qalet li hija taħdem biex jitwettaq proġett ta’ immaniġjar aħjar tat-traffiku biex in-nies jingħataw prijorità fuq il-karozzi.

Dwar il-proġett Safe Cities u l-użu tat-teknoloġija tal-facial recognition, l-Alternattiva qed tinsisti li l-ordni pubblika jirrikjedi ħarsien ikbar tad-drittijiet fundamentali. Għalhekk, ingħad li l-Kunsill ta’ San Ġiljan għandu jara li titħares il-privatezza tan-nies. Il-Perit Cacopardo semma kif skont l-għaqda mhux governattiva Big Brother Watch fir-Renju Unit dawn it-tip ta’ sistemi jagħtu riżultati żbaljati għaliex it-teknoloġija għada mhix żviluppata biżżejjed.