Toroq
L-aħħar fażijiet tax-xogħlijiet fuq ir-rotta bejn il-Marsa u Santa Venera

Se jkun tlesta qabel ippjanat u fil-ħin għall-bidu ta’ sena skolastika ġdida t-twessigħ tar-rotta bejn il-Marsa u Santa Venera. Dan sar b’interventi fuq il-bypass bejn il-Marsa u l-Ħamrun, Triq Diċembru 13 u Triq Aldo Moro.

Il-Ministru għall-Infrastruttura u l-Proġett Kapitali, Ian Borg qal li dan il-proġett sar b’investiment ta’ aktar minn €14-il miljun. Dwar il-proġett tal-junction tal-Marsa, Dr Borg ħabbar li mix-xahar id-dieħel se tibda t-tielet fażi tal-proġett li tinvolvi l-bini ta’ seba’ strutturi u fly-overs.

Bil-karozzi fit-toroq mistennija jiżdiedu mit-Tnejn, tlesta l-proġett ta’ twessigħ tal-bypass bejn il-Marsa u l-Ħamrun, bil-karreġġjati fuq kull naħa issa telgħu minn tnejn għal tlieta. Dan il-proġett involva wkoll twessigħ tal-karreġġjati fi Triq Diċembru 13 u qed titwessa’ Triq Aldo Moro.

Il-Kap Eżekuttiv ta’ Infrastructure Malta, Frederick Azzopardi qal ”fil-ġimgħat ta’ wara, se nkunu qed nispiċċaw il-proġett ta’ Triq Aldo Moro fejn se nispiċċaw b’6 korsiji fuq naħa u 4 korsiji fuq naħa l-oħra. Nista’ ngħid li kien proġett enormi ta’ €14-il miljun li wettaqnieh fi ftit xhur u se jkun qed itejjeb id-dħul u l-ħruġ minn dawn l-akkwati.”

L-Inġinier Azzopardi qal li dan il-proġett involva aktar minn 15-il kilometru ta’ karreġġjati ġodda jew mibnija mill-ġdid li għandhom inaqqsu l-ħin tal-ivvjaġġar. Intqal li tul aktar minn erba’ kilometri tpoġġew barrikati ta’ lqugħ biex tiżdied is-sigurtà għas-sewwieqa u karreġġjata ta’ 400 metru fi Triq Aldo Moro għal min jivvjaġġa bir-rota.

Il-Ministru għall-Infrastruttura u l-Proġetti Kapitali, Ian Borg qal li dan il-proġett, li kien skedat li jitlesta s-sena d-dieħla, tlesta fi żmien rekord ta’ 8 xhur.

Il-Ministru għall-Infrastruttura u Proġetti Kapitali, Ian Borg qal ”issa anki li jibdew l-iskejjel tibda anki sfida akbar fit-toroq se naraw li ma jkunx hawn ostakli fuq il-korsiji tal-pajjiż li huma distributorji u arterjali u naħdmu aktar fuq toroq residenzjali u rurali. Ix-xogħol ma jiqafx għax għandna commitment ta’ €100 miljun fis-sena għas-seba’ snin li ġejjin.”

Dwar il-proġett tal-Junction tal-Marsa, Dr Borg qal li x-xogħlijiet fuq it-tielet fażi se jirrankaw mix-xahar id-dieħel.

It-tielet fażi bażikament qed nitkellmu fuq seba’ strutturi u fly-overs fejn hemmhekk tiġi eliminata darba għal dejjem is-sistema ta’ traffic lights li għandek quddiem iċ-ċimiterju tal-Addolorata. Ġej minn fejn ġej u sejjer minn fejn sejjer inti ma tieqaf prattikament qatt.

Dr Borg qal li Infrastructure Malta qed taħdem fuq interventi f’ħoloq oħra kruċjali fosthom fi Vjal l-Avjazzjoni li jgħaqqad l-Ajruport ma’ Ħal Luqa, it-triq magħrufa taċ-Ċawsli li tgħaqqad iż-Żejtun ma’ Ħaż-Żabbar, u t-Triq tal-Balal bejn in-Naxxar u San Ġwann.

Aħbarijiet Oħra
Droga

L-Aġenziji li jaħdmu mal-vittmi tad-droga fosthom is-Sedqa u l-Caritas huma tal-fehma li l-użu rikreattiv tal-kannabis m’għandux ikun promoss għax ikattar il-kultura favur l-abbuż tad-droga. Din il-fehma intweriet waqt il-programm Dissett…

Partit Nazzjonalista

Il-President tal-Kunsill Ġenerali tal-Partit Nazzjonalista Kristy Debono qalet fi stqarrija li sabet li 84 mill-200 firma fil-petizzjoni li titlob biex jitlaqqa’ l-Kunsill Ġenerali biex jiddiskuti l-ġejjieni tal-Kap tal-Partit Nazzjonalista huma…

Lokali

Ta’ tnax-il sena sofriet diżabilità minħabba mard u wara ħafna snin ta’ żwieġ kellha tifel bil-kundizzjoni down syndrome. Minkejja l-isfidi, Lorraine Pellicano tgħid li Thomas berkilha ħajjitha u ħerqana li…

Lokali

Meqjusa fost l-ewwel tobba f’Malta li bdiet taħdem bla heda mal-vittmi tad-droga, ħidmet it-tabiba Maria Sciberras tfakkret f’konferenza f’għeluq il-25 sena mit-twaqqif tal-Aġenzija Sedqa u fil-jum internazzjonali kontra l-abbuż u…

Aktar