Sigurtà
L-akbar investiment tal-AFM – €50m għal patrol boat li bdiet tinbena l-Italja

F’tarzna fl-Italja beda x-xogħol fuq l-akbar investiment li qatt daħlet għalih l-armata Maltija: il-bini ta’ patrol boat kbira bi spiża ta’ madwar €50 miljun. Hu pjanat li sa sentejn oħra l-lanċa tkun daħlet fis-servizz u b’hekk ikomplu jissaħħu l-kapaċitajiet tal-Iskwadra Marittima f’rondi u ħidmiet f’distanzi ‘l bogħod minn Malta.

Il-kumpanija Cantiere Navale Vittoria li tinsab fin-naħa ta’ fuq tal-Italja rebħet il-kuntratt biex tibni patrol boat kbira għall-Forzi Armati ta’ Malta. B’disgħin sena ta’ esperjenza fil-mestjier, il-kumpanija bniet reputazzjoni fil-bini ta’ laneċ u dgħajjes li jintużaw għal ħidmiet ta’ sigurtà u salvataġġ minn korpi dixxiplinati f’għadd ta’ pajjiżi fil-Mediterran. Il-kuntratt mal-Forzi Armati ta’ Malta għall-bini tal-akbar patrol boat li qatt kellha l-armata Maltija jfisser investiment ta’ madwar €50m li għalih l-armata kisbet fondi Ewropej.

Il-Kap Kmandant tal-Forzi Armati, il-Brigadier Jeffrey Curmi qal ”hi investiment kbir, l-akbar investiment li qatt għamlet il-Forzi Armati. Qed nitkellmu fuq opv ta’ madwar €50m, €48m. Ix-xogħol beda.”

Il-Kap Kmandant tal-Forzi Armati, il-Brigadier Jeffrey Curmi, spjega li l-proġett jaħseb ukoll għal programm ta’ taħriġ biex, sal-mument li l-lanċa tasal Malta, ikun iffurmat ekwipaġġ kompetenti li jużaha u jagħmel il-manutenzjoni meħtieġa.

”Aħna diġà għandna pjan ta’ min u kif se jitla’ fit-tarzna fejn qed tinbena, numru ta’ inġiniera tagħna, numru ta’ teknici tagħna, biex jikkonferma x-xogħol u jkunu parti mill-proġett. Jiġifieri mmaġina kemm se jkun utli meta l-lanċa tiġi lura, b’nies tekniċi tagħna stess li kienu preżenti waqt li kienet qed tinbena l-lanċa” qal il-Brigadier Curmi.

Bl-Iskwadra Marittima tissemma l-aktar f’każi ta’ immigrazzjoni illegali u f’ħidmiet ta’ salvataġġ fuq il-baħar, il-Brigadier Curmi assigura li, lil hinn minn hekk, l-armata jkollha laneċ għaddejjin b’rondi fl-ibħra Maltin 24 siegħa kuljum, f’xogħol relatat ma’ infurzar tal-liġijiet u l-ġlieda kontra l-kriminalità. Dan qal jitlob koordinament u koperazzjoni ma’ entitajiet oħra bħall-Pulizija, id-Dwana u d-Dipartiment tas-Sajd.

”Jaf inkunu qed niġbru informazzjoni kemm għalina kif ukoll għal korpi dixxiplinati oħrajn, inkunu qegħdin nippjanaw, inkunu qegħdin niddiksutu mal-entitajiet l-oħra kif wieħed l-aħjar li jopera. Jista’ jkun li operation fuq il-baħar tkun l-aħjar soluzzjoni. Jistà jkun li ma tkunx” kompla jgħid il-Brigadier Curmi.

Fuq il-baħar ukoll, l-Armata se żżid il-preżenza tagħha fin-naħa ta’ fuq ta’ Malta. F’Għawdex, fejn l-armata għandha lanċa u dinghy ibbażati fil-Port tal-Imġarr, se jkun hemm għall-ewwel darba grupp ta’ għaddasa bbażati f’Għawdex. Il-Brigadier Curmi qal li s-suldati li se jaqdu dan l-irwol intgħażlu u qed jirċievu taħriġ professjonali biex ikunu kwalifikati wkoll fis-salvataġġ ta’ persuni li jsibu ruħhom f’diffikultà fil-baħar. Huma se jkunu parti mill-Bomb Disposal Unit, biex f’każ ta’ ħtieġa jkunu jistgħu jagħmlu wkoll xogħol relatat ma’ splussiv u logħob tan-nar.

Aħbarijiet Oħra
Stejjer Umani

F’aktar minn ħamsin sena, l-Għaqda Alkoħoliċi Anonimi għenet mijiet ta’ persuni bi problema ta’ xorb żejjed, u ħafna drabi anke lill-qraba tagħhom permezz tal-AL-ANON. TVM tkellem ma’ raġel li 27…

Infrastruttura

Għaddejin l-aħħar tħejjijiet għat-tlestija ta’ Triq Ħal Luqa, li hija l-arterja ewlenija bejn Santa Luċija u Ħal Luqa. Bejn it-Tlieta filgħodu u l-Erbgħa waranofsinhar, it-triq se tingħalaq f’direzzjoni waħda sakemm…

Trasport

Matul l-aħħar snin, Transport Malta flimkien mal-Ministeru tat-Trasport nedew diversi skemi fuq ix-xiri ta’ mezzi tat-trasport biex jonqos it-tniġġis tal-arja. Tnejn mill-iskemi li qed jagħtu riżultati huma għax-xiri tal-karozzi elettriċi…

Annimali

Uffiċjali u membri tal-FKNK żaru l-Iskola Primarja ta’ Ħ’Attard fejn indirizzaw it-tfal li bħalissa qed jattendu Skola Sajf. Il-membri kellhom magħhom Kelb tal-Kaċċa ta’ Malta u Kelb tal-Fenek, bit-tfal li…

Aktar