Barranin
L-Amerika u l-Iran jaqblu fuq skambju ta’ xjentisti miżmuma priġunieri

L-awtoritajiet Amerikani u Iranjani qablu li jeħilsu priġunier kull wieħed, fi ftehim li wassal biex ir-riċerkatur Ċiniż-Amerikan Xiyue Wang, li ilu arrestat fl-Iran tliet snin, u l-espert fl-istem cells Iranjan, Massoud Soleimani, li kien ilu miżmum f’Chicago mis-sena l-oħra, jinħelsu.

Xiyue kien akkużat bi spjunaġġ kontra l-Iran, filwaqt Soleimani kien akkużat li kien qed iġorr materjal bioloġiku lejn l-Iran mill-Istati Uniti. Iż-żewġ persuni ċaħdu l-akkużi miġjuba kontrihom.

Xiyue ser jingħaqad ma’ martu u binhom Shaofan li ma rax il-missieru f’dan l-aħħar tliet snin. Huwa mar l-Iran biex iwettaq riċerka għat-teżi tad-dottorat tiegħu, iżda kif kien ħiereġ mill-pajjiż ġie akkużat li kien qed iġorr materjali kunfidenzjali għall-istituzzjonijiet akkademiċi fir-Renju Unit u l-Istati Uniti.