Lokali
L-Awtorità tad-Djar toffri l-għajnuna lill-familji milquta mit-tiġrif fi Gwardamanġa

L-Awtorità tad-Djar qalet li qed toffri l-assistenza neċessarja lill-familji milquta mit-tiġrif ta’ parti minn blokka ta’ appartamenti fi  Gwardamanġa.

Fi stqarrija l-Awtorità tad-Djar qalet li hija nfurmata li l-erba’ familji affettwati kollha ngħataw akkomodazzjoni alternattiva mill-kuntrattur.

Matul il-jum rappreżentanti tal-Awtorità kienu preżenti fuq il-post tal-inċident u bdiet ħidma biex tara li l-familji jkollhom l-assistenza kollha neċessarja f’mument daqstant diffiċli.

L-Awtorità wara li tkellmet ma’ kull familja affettwata se tkun qed toffri wkoll għajnuna biex dawn il-familji jkunu jistgħu jixtru l-affarijiet bażiċi biex ikunu jistgħu jkomplu b’ħajjithom. Għalhekk, l-Awtorità se tkun qiegħda tagħti għajnuna finanzjarja lil kull persuna affettwata skont il-ħtieġa tagħha.

L-Awtorità se tibqa’ f’kuntatt ma’ kull familja u se tkun qiegħda tkompli ssegwi l-każ sabiex tassigura li toffrilhom kull assistenza li jkunu jeħtieġu.

L-Awtorità kienet ukoll f’kuntatt kontinwu mas-Segretarju Parlamentari għall-Akkomodazzjoni Soċjali Roderick Galdes li qed isegwi l-aħħar żviluppi dwar il-każ.

Ara wkoll:

“Ħaduli kollox… ma baqali xejn” – residenta fil-blokka li ġġarrfet