Saħħa
L-e-cigarettes iħallu impatt negattiv fuq il-moħħ, il-vini u l-pulmun

L-e-cigarettes fl-Istati Uniti kienu l-kawża tal-mewt ta’ aktar minn erbgħin persuna – ħafna minnhom żgħażagħ. Fil-Belġju tilef ħajtu żagħżugħ ta’ tmintax-il sena.

Riċerka li saret dan l-aħħar turi li l-e-cigarettes iħallu impatt negattiv fuq il-moħħ, il-vini u l-pulmun. Għadd ta’ riċerkaturi ħeġġew biex l-e-cigarettes jiġu projbiti, kif ġara fi New York City u anke fl-Indja.

L-e-cigarettes huma fenomenu li qed jinkwieta lill-awtoritajiet tas-saħħa Maltin ukoll, minħabba li qed jintużaw aktar, speċjalment fost iż-żgħażagħ.

Tnax fil-mija tal-adolexxenti Maltin, l-aktar dawk li għandhom bejn il-ħmistax u s-sittax-il sena jużaw sigaretti elettroniċi: l-e-cigarettes. Dan ħareġ minn studju li sar mis-Sovrintendenza tas-Saħħa Pubblika. Ir-riżultat qed jinkwieta lis-Supretendent tas-Saħħa Pubblika, il-Professur Charmaine Gauci.

”Nafu li s-sigaretti bil-mod il-mod konna qed inaqqsuhom u anke ma kinux iktar attraenti speċjalment għaż-żgħażagħ però l-fatt li jibda jkollok żgħażagħ li qed jużaw l-e-cigarettes huwa ċans kbir li aħna nerġgħu nirriversjaw l-epidemija tat-tabakk.”

Il-Professur Gauci qalet li kuntrarju għal dak li jaħsbu bosta, l-e-cigarettes mhumiex alternattiva għas-sigaretti u jagħmlu ħsara daqs, jekk mhux aktar, mis-sigaretti.

”Dawn id-devices tal-ġurnata tal-lum inti għandek iktar ammont ta’ nikotina li tista’ tidħol ġol-ġisem iktar malajr, allura l-persuna jkun qed jieħu iktar nikotina milli kieku hu qed jieħu s-sigaretti.”

Studji tal-Għaqda Dinjija tas-Saħħa jikkonfermaw li l-e-cigarettes mhumiex alternattiva biex persuna taqta’ s-sigaretti. Il-professur Gauci qalet li hemm alternattivi oħra biex wieħed jieqaf ipejjep, li huma kontrollati u manifatturati bħal mediċini oħrajn.

Il-Professur Gauci żiedet tgħid li l-e-cigarettes mhumiex biss ta’ ħsara għal min jużahom imma anke għal persuni li jkunu ħdejhom. F’għajnejn il-liġi, e-cigarettes huma meqjusa bħas-sigaretti u l-prodotti tat-tabakk l-oħrajn kollha. Għalhekk ma jistgħux jintużaw fuq ġewwa u lanqas jista’ jsir reklamar tagħhom.

Fl-Istati Uniti, l-uffiċjali tas-saħħa rrappurtaw aktar minn elfejn każ ta’ mard respiratorju u aktar minn erbgħin persuna tilfu ħajjithom minħabba l-użu tal-e-cigarettes u l-kimika ta’ ġo fihom.

”Iridu niftakru li l-Amerika mhemmx il-kontrolli li hemm fl-Ewropa tal-konstitwenti ta’ xi jkun fihom l-e-cigarettes. F’Malta aħna ma rajnha l-ebda każ minn dawn u anqas jekk tħares lejn l-Ewropa – l-uniku każ li ġie rappurtat kien wieħed Belġjan li issa għadu qed jiġi investigat.”

Għalkemm preferibbilment ma jintużawx, il-Professur Gauci appellat biex l-e-cigarettes ma jinxtrawx minn fuq l-internet.

Aħbarijiet Oħra
Teknoloġija

Il-kumpanija Go qed tavża lil klijenti tagħha li s-servizz inqata’ f’xi nħawi minħabba kuntrattur ta’ terzi li għamel ħsara fil-fibre network fiż-Żejtun. Qalet li l-qtugħ fis-servizz huwa relatat l-iktar mal-internet u…

Qorti

L-Avukat Ġenerali talab lill-Qorti biex tiġi riveduta d-deċiżjoni tal-maġistrat li jagħti l-ħelsien mill-arrest liż-żewġ suldati akkużati bil-qtil tal-immigrant Lassana Cisse. Hu fil-fatt talab lill-Qorti kriminali biex tirrevoka d-deċiżjoni tal-ħelsien mill-arrest…

Politika

Fil-konferenza tal-aħbarijiet hekk kif intemm is-summit fi Brussell bejn il-mexxejja Ewropej, il-President tal-Kunsill Ewropew, Charles Michel, qal li fil-laqgħa ma saret l-ebda diskussjoni fuq l-investigazzjoni tal-assassinju ta’ Daphne Caruana Galizia….

Unjoni Ewropea

Ir-riżultat tal-elezzjoni ġenerali fir-Renju Unit jidher li sa fl-aħħar iċċara l-proċess għal Brexit. B’hekk, f’summit Ewropew, Mexxeja Ewropej talbu li dan il-ftehim jitressaq fil-Parlament Ingliż. Il-President tal-Kunsill Ewropew, Charles Michel…

Aktar