Barranin
L-EMA tgħid li żewġ dożi tal-vaċċin kontra l-COVID-19 huma biżżejjed

L-Aġenzija tal-Mediċini Ewropea l-EMA qalet li għalissa ż-żewġ dożi tal-vaċċin huma biżżejjed biex jilqgħu għall-COVID-19 u l-varjanti tiegħu inkluż il-varjant Delta.

Fl-aħħar jiem il-kumpanija Pfizer/BioNtech applikaw biex jiksbu l-awtorizzazzjoni għal booster fl-Ewropa, fl-Istati Uniti u fl-Asja.

Madankollu r-regolatur tal-mediċini fl-Unjoni Ewropea qal li għadu kmieni biex jiġi ddeterminat jekk hemmx bżonn aktar minn żewġ dożi tal-vaċċin.

L-Aġenzija tal-Mediċini Ewropea qalet li tinsab fiduċjuża li għalissa żewġ dożi tal-vaċċin huma “biżżejjed”.

Il-pjan ta’ Pfizer BionNTech huwa bbażat fuq evidenza ta’ riskju akbar ta’ infezzjonijiet sitt xhur wara t-tieni doża u t-tixrid b’rata tal-varjant Delta li jinfirex ħafna iktar malajr minn varjanti oħrajn.

L-Għaqda Dinjija tas-Saħħa qalet li l-informazzjoni dwar kemm se ttawwal il-protezzjoni tal-vaċċini preżenti hija waħda limitata.

Intant fi stqarrija konġunta, iċ-Ċentru għall-Kontroll u l-Prevenzjoni tal-Mard, CDC u l-Food and Drug Administration, l-FDA qalu wkoll li għalissa l-Amerikani li ħadu ż-żewġ dożi m’għandhomx bżonn il-booster. Huma qalu li jinsabu mħejjija għad-dożi tal-booster f’każ li x-xjenza turi li hemm bżonn il-ħtieġa tiegħu.