Avjazzjoni
L-Emirates terġa’ tibda ttir lejn 9 destinazzjonijiet minn 3 ijiem oħra

Il-linja tal-ajru Emirates se terġa’ tibda topera titjiriet lejn disa’ destinazzjonijiet li huma Londra, Frankfurt, Pariġi, Milan, Madrid, Chicago, Toronto, Sydney u Melbourne.

It-titjiriet se jibdew mill-21 ta’ Mejju, dejjem jekk ikun hemm l-approvazzjoni tal-Gvernijiet. Fi stqarrija l-Emirates qalet li se tkun qed toffri ‘connection flights’ f’Dubai għall-passiġġieri li jivjaġġaw bejn ir-Renju Unit u l-Awstralja.

Il-passiġġieri se jkunu aċċettati fuq dawn it-titjiriet jekk ikunu konformi mal-eliġibilità u l-kriterji tad-dħul tal-pajjiżi fejn sejrin inkluż l-approvazzjoni għar-residenti tal-Emirati Għarab Magħquda jekk dawn jixtiequ jirritornaw Dubai.

L-Emirates qalet li se tkun qed issegwi diversi miżuri ta’ sigurtà għall-benefiċċju kemm ta’ saħħet il-passiġġieri kif ukoll tal-membri tal-istaff tal-kumpanija.