Eurovision
L-ewwel u l-aħħar kanzunetta huma dawk li l-votant jista’ jibqa’ jiftakar l-aktar – Dr Cremona

Michela se tkun l-ewwel li tkanta fil-finali ta’ għada tal-Eurovision. Dan wara li lbieraħ filgħaxija – b’ħafna terturi u qtigħ il-qalb – isem Malta kien l-aħħar li tħabbar fost l-għaxar kanzunetti li kkwalifikaw mit-tieni semi-finali.

Fl-ewwel reazzjoni, Michela wriet sodisfazzjon u qalet li qatt ma basret li se tara l-ħolma tagħha ssir realtà. L-aħħar darba li Malta għaddiet għall-finali kien fl-2016.

It-tħabbir tal-għaxar kanzunetti għall-finali tal-Eurovision kien test tal-qalb qawwi għal bosta speċjalment għal Michela li bir-reazzjoni ta’ ferħ tagħha kompliet tisraq il-qlub tal-Ewropej u lil hinn wara wirja tajba ħafna tal-kanzunetta Chameleon li biha reġgħet poġġiet lil Malta fil-finali wara nuqqas ta’ żewġ edizzjonijiet.

Dr George Cremona, riċerkatur dwar il-valur edukattiv tal-Eurovison qal li t-talent ta’ Michela ssorprenda lil ħafna osservaturi u ġurnalisti internazzjonali li kkumentaw b’mod pożittiv fuq ir-rebbieħa tal-ewwel X Factor Malta.

“Bdew isemmu fatti li permess tagħhom juru li Michela mhux biss brava imma rridu napprezzaw din il-bravura, eżempju fl-artikli u l-filmati qalu isma’ din 18-il sena kull m’għad għandha, isma’ din minn gżira żgħira, isma’ din qatt ma kienet fuq palk daqshekk kbir.”

Michela ma tantx kellha ċans tiċċelebra li għaddiet għal finali għaliex kmieni l-Ġimgħa filgħodu kellha prova oħra qabel il-prova uffiċjali li matulha se tkun iġġudikata mill-ġurija professjonali għal 50% tal-voti.

Is-Sibt filgħaxija, Michela se tkanta l-ewwel fost 26 kanzunetta. Għal Dr Cremona, statistikament din il-polza ma tantx hi favorevoli għax fl-aħħar 20 sena, ħadd li kanta l-ewwel ma rebaħ iżda hemm min jargumenta mod ieħor.

“Hemm anke argumenti psikoloġiċi li jgħidulek li tara fil-bidu u li tara fl-aħħar aktar ħa tiftakru meta ħa tivvota lejn fl-aħħar.”

Is-Sibt il-finali tal-Eurovision Song Contest se tixxandar dirett fuq Television Malta u tvm.com.mt fid-disgħa ta’ filgħaxija.

 

Aħbarijiet Oħra
Politika

Jidher li l-partiti għamlu ħidma akbar biex jiġu eletti aktar nisa eliġibbli għall-kandidatura anke fost il-partiti ż-żgħar fuq livell Ewropew. Il-Professur Carmen Sammut qalet li fuq livell Ewropew, il-“family friendly…

Politika

Il-Membru Parlamentari għall-Partit Laburista Alex Muscat qal li r-riżultat ta’ din l-elezzjoni tal-Parlament Ewropew huwa l-ewwel ġudizzju tal-poplu wara l-każ Egrant. Dan Alex Muscat qalu waqt il-programm Insights immexxi mill-ġurnalista…

Politika

F’kollegament dirett ma’ TVM, fuq il-programm Insights immexxi mill-ġurnalista Norma Saliba, l-uffiċjal tal-Partit Laburista Louis Gatt, qal li ħarġu xi riżultati proviżorji mill-ewwel għadd tal-voti. Dr Miriam Dalli għall-Partit Laburista…

Aktar