Agrikultura
“Tini l-boots u ttini kollox” – it-tfajla li trid tqatta’ għomorha raħħala

Iggradwat fil-kura tal-annimali . . . iżda ma riditx taħdem bħala veterinarju. Amaya Mercieca Frantz għandha 23 sena. Stqarret li ma tħosshiex maqtugħa għal xogħol f’uffiċċju . . . u l-hena tagħha meta xxidd il-boots fir-razzett, taħdem qalb il-baqar tal-ħalib.

Xena rari f’razzett kbir f’Ħal Għaxaq; tfajla ta’ 23 sena tmexxi l-baqar għall-ħlib.

“Hawn ħafna nisa li dan ix-xogħol żgur ma jagħmluhx, imma jien ma niddejjaqx. Inħossni vera kburija li jien mara u naħdem hawn għax vera ftit nisa li jaħdmu f’razzett,” qalet ir-raħħala Amaya Mercieca Frantz.

In-nies spiss jistagħġbu għax jarawha taħdem ta’ raħħala. “Hawn ħafna min jgħidlek ‘jaq kif taħdem hekk?’ eżempju. Imma li kieku aħna ma nagħmlux dan ix-xogħol, ħaddieħor kif se jkollu l-prodott? Il-ħalib frisk kuljum fuq il-mejda? Kif se tagħmel it-te u l-kafè filgħodu?”

Għalkemm ix-xogħol ta’ raħħal jitlob impenn kbir, is-sodisfazzjon ma tibdlu ma’ xejn. “Ma nimmaġinanix naħdem ġo uffiċċju magħluqa ġewwa. Jien l-hena tiegħi niġi hawn.”

Fir-razzett hemm mal-400 baqra. Amaya tiftakar lil uħud minnhom jitwieldu. “Il-gost tagħna li minn għoġġiela żgħar tarahom jikbru, imbagħad tgħammarhom, ikollhom iż-żgħar huma, imbagħad jinħelbu huma, imbagħad tara l-kwalità tal-ħalib li jtuk.”

Dan ix-xogħol kollu li jsir fir-razzett għal dawn il-5 minuti ta’ kull baqra biex teħdilha l-ħalib.

Tixtieq li uliedha jkomplu fuq il-passi tagħha. “Nimmaġinani iva, li nibqa’ ħajti kollha, u jekk ikolli t-tfal, l-ewwel ħaġa li ngħidilhom hi biex jaħdmu f’razzett.”

Għalkemm tgħoddhom fuq subgħajk iż-żgħażagħ b’karriera fl-agrikoltura, Amaya tistqarr li kuntenta tibqa’ taħdem mal-baqar. “Ma nimmaġinanix nilbes, bħal speċi, ġlekkijiet jew hekk. Żgur. Mill-bqija jien tini l-boots u daqshekk, ittini kollox!”

Aħbarijiet Oħra
COVID-19

Il-Ministeru għas-Saħħa kkonferma li mhemm l-ebda każ ġdid għal-lum ta’ Coronavirus f’Malta. Tħabbar ukoll li 14-il persuna oħra ġew imfejqa mill-virus biex b’hekk it-totla ta’ mfejqa s’iss jitla’ għal 576…

Lokali

Id-destin tal-ponta ta’ Paceville reġa’ jinsab fl-arena ta’ argumenti favur u kontra l-iżvilupp propost mill-grupp DB. Il-Moviment Graffitti b’koalizzjoni ta’ għaqdiet u tliet kunsilli lokali ddikjara li anke l-pjanti riveduti…

Lokali

L-MUT ordnat tilwima industrijali mal-Gvern u ordnat direttivi sabiex fi kliemha tħares is-saħħa u s-sigurtà tal-membri. Fi stqarrija, l-MUT qalet li ma ġiet involuta bl-ebda mod fid-diskussjonijiet dwar id-deċiżjoni mill-Gvern…

Għawdex

B’investiment ta’ €130,000 waslu fl-aħħar stadju tagħhom ix-xogħlijiet fuq l-għassa ta’ Marsalforn, biex fi ftit tax-xhur oħra tkun tista’ taqdi aħjar lir-residenti u l-eluf li jżuru l-lokalità speċjalment fix-xhur tas-sajf….

Aktar