Ekonomija u Finanzi
L-industrija tal-kannabis mediċinali se tikber għal €1 biljun fi 3 snin – Il-PM

Bejn illum u l-Ħamis qed jitlaqqa’ f’Malta l-forum dinji dwar il-kannabis mediċinali. Illejla indirizza l-forum il-Prim Ministru Joseph Muscat, li ta ħjiel dwar dak li Malta qed tistenni minn din l-industrija ġdida, fosthom li l-ewwel esportazzjoni minn Malta ta’ dawn il-prodotti se ssir is-sena d-dieħla.

Il-Prim Ministru qal li l-industrija tal-kannabis mediċinali f’Malta mistennija tikber għall-biljun ewro f’temp ta’ tliet snin. Dr Muscat kien qed jindirizza l-forum dinji tal-kannabis mediċinali li qed ilaqqa’ flimkien f’Malta lill-operaturi ewlenin fl-industrija tal-kannabis mediċinali.

Dr Muscat qal li din hi niċċa li fiha l-Gvern jara potenzjal kbir, u li l-investituri qed jirrispondu tajjeb għall-ħidma tal-Gvern Malti. F’dan l-isfond hu qal li s’issa 50 kumpanija rreġistraw l-interess tagħhom biex jibdew joperaw minn Malta. Spjega iżda li minnhom il-Malta Enterpise approvat 24 kumpanija. Għall-Prim Ministru, dan juri biċ-ċar kemm Malta trid tattira l-aqwa u l-aħjar kumpaniji f’din l-industrija. Qal li s-sena d-dieħla Malta se tesporta l-ewwel prodotti ta’ kannabis mediċinali.

Il-Ministru tal-Ekonomija, Chris Cardona, qal li Malta hu l-post ideali għal dan l-investiment għal ħafna raġunijiet, fosthom id-daqs li qal jgħin lill Gvern jirreaġġixi u jaddatta għad-domandi tas-suq. Mistoqsi minn TVM dwar il-perċezzjoni pubblika dwar din l-industrija, il-Ministru stqarr li din qed tinbidel minħabba r-riċerka klinika li turi l-benefiċċji tal-kannabis mediċinali.

“Qed naraw bidla fil-ħsieb. Xjenzati u riċerkaturi, testijiet kliniċi speċjalment pazjenti li jkunu morda b’mard terminali. Qed tinbidel, ċertu umanità, illi jekk għandna xjenza li tista’ tipprovdi medikament soluzzjonijiet, għalfejn m’għandniex niħduha u ma niffukawx l-isforzi tagħna f’din id-direzzjoni?”

Dr Cardona ħabbar li se tiġi emendata l-liġi biex ir-riċerka u l-manifattura tal-prodotti tal-kannabis mediċinali tkopri wkoll l-annimali. “Id-dritt tal-annimal ħafna iżjed minn kemm kien qabel, għandna għalfejn niffukaw fuq riċerka li twassal għal innovazzjoni li jingħataw l-annimali, li jistgħu jitfejqu b’dan it-tip ta’ mediċina.”

Is-Segretarju Parlamentari Deo Debattista saħaq fuq il-bżonn ta’ aktar riċerka f’dan il-qasam sabiex tkompli l-industrija tal-kannabis mediċinali tkompli tikber.

Aħbarijiet Oħra
Kronaka

Żewġ persuni ttieħdu l-Isptar Mater Dei, u oħrajn il-policlinic ta’ Ħal Kirkop, wara li għall-ħabta tat-tlieta ta’ wara nofsinhar, seħħet ħabta bejn ħames karozzi f’Ħal Luqa. Karozza tat-tip Ford Escort…

Politika

L-eks Chief of Staff Keith Schembri ssejjaħ fil-kwartieri ġenerali tal-Pulizija llum waranofsinhar, b’rabta mal-investigazzjoni fl-impjieg finta ta’ Melvin Theuma, l-intermedjarju fil-qtil ta’ Daphne Caruana Galizia. Theuma xehed fil-Qorti li kien…

Edukazzjoni

Il-Malta Union of Teachers fakkret il-mitt sena mit-twaqqif tagħha permezz ta’ monument ġdid fil-Mall tal-Floriana. Il-monument juri tifla bil-qiegħda taqra ktieb. Warajha bieb miftuħ li jissimbolozzia l-kunċett ta’ moħħ li…

Politika

Wara x-xhieda ta’ Melvin Theuma fil-Qorti aktar kmieni din il-ġimgħa, fl-aħħar sigħat il-Pulizija kellmet diversi uffiċjali fl-investigazzjoni tagħha dwar l-impjieg finta tal-istess Theuma. Sorsi li tkellmu ma’ Television Malta qalu…

Aktar