Festi
L-irħajjel ‘Tad-Daħla’ fir-Rabat jiċċelebra l-festa tal-kappella ddedikata lil Santa Katerina

Il-festi titulari fl-istaġun sajfi ġew iċċelebrati kollha. Iżda l-festi għadhom għaddejjin. Fil-fatt, fi tmiem din il-ġimgħa qed jiġu ċċelebrati ħafna festi żgħar f’kappelli li għandna f’Malta u Għawdex. Waħda minnhom hi dik dedikata lil Santa Katerina li tinsab f’irħajjel fil-limiti tar-Rabat. Din il-kappella qed tiġi restawrata.

Fi rħajjel magħruf bħala “Tad-Daħla”, nofs triq bejn ir-Rabat u Ħad-Dingli jgħixu madwar ħmistax-il familja li f’dawn il-ġranet ikunu mħabbtin sew biex jorganizzaw il-festa tal-kappella tagħhom dedikata lil Santa Katarina.

Din is-sena huma kburin li qed jiċċelebraw il-festa f’kappella li għaddejja minn restawr estensiv. Il-kappella ġiet restawrata minn ġewwa u nżebgħet bi skala ġdida ta’ kuluri. Tlesta wkoll ir-restawr tal-faċċata, u kif tgħaddi l-festa se jitkompla r-restawr tal-ħitan tal-ġnub u fuq wara. Dan ix-xogħol kollu ta’ ħarsien ta’ wirt storiku qed jiġi finanzjat mill-Uffiċċju għall-Proġetti ta’ Riabilitazzjoni fi ħdan il-Ministeru tat-Trasport u l-Infrastruttura. Ma’ dan ix-xogħol, il-ftit residenti f’din il-komunità qed jagħmlu l-parti tagħhom ukoll biex isebbħu l-kappella, tant li għall-festa qed iżanżnu żokklatura ġdida tal-irħam, sopraporti u loppa ġdida għal-lampier.

Is-Sibt u l-Ħadd, il-festa tiġi ċċelebrata bil-quddiesa, marċi mill-banda, logħob tan-nar u fiera. Il-Ħadd filgħaxija ssir ukoll il-purċissjoni bi statwa ta’ Santa Katarina.

Il-Viċi Arċipriet tar-Rabat, il-Kanonku Claude Mifsud qal “aħna nemmnu li mietet, ħadet il-martirju għal Kristu. Santa Katarina fis-socjetà tagħna llum tgħallimna l-importanza li għandna nkunu nsara li nibqgħu b’fidi sħiħa fil-Mulej tagħna, Ġesù Kristu.”

Lil hinn mill-festa annwali, il-ħajja fl-irħajjel “tad-Daħla” tul il-kumplament is-sena hi kwieta ħafna bil-quddiesa ta’ tmiem il-ġimgħa sservi bħala l-laqgħa tal-komunità.

Il-Kanonku Claude Mifsud qal “bħala parroċċa nirringrazzjaw lil Alla għadna nistgħu nagħtu dan is-servizz. F’din il-kappella s-Sibt filgħaxija jkun hawn il-quddiesa biex tkun il-quddiesa li tgħodd għall-Ħadd, li wkoll għall-grazzja t’Alla kemm il-familji li jgħixu hawnhekk kif ukoll il-familjari tagħhom, għax dik hi l-aktar interessanti li l-familjari tagħhom għadhom jinġabru fejn ommijiethom, in-nanniet tagħhom, nibdew mill-quddiesa u mbagħad ikomplu jaqsmu tmiem il-ġimgħa bħala familja.”

Din il-kappella hi fir-responsabilità tal-parroċċa tar-Rabat.

Aħbarijiet Oħra
Droga

L-Aġenziji li jaħdmu mal-vittmi tad-droga fosthom is-Sedqa u l-Caritas huma tal-fehma li l-użu rikreattiv tal-kannabis m’għandux ikun promoss għax ikattar il-kultura favur l-abbuż tad-droga. Din il-fehma intweriet waqt il-programm Dissett…

Partit Nazzjonalista

Il-President tal-Kunsill Ġenerali tal-Partit Nazzjonalista Kristy Debono qalet fi stqarrija li sabet li 84 mill-200 firma fil-petizzjoni li titlob biex jitlaqqa’ l-Kunsill Ġenerali biex jiddiskuti l-ġejjieni tal-Kap tal-Partit Nazzjonalista huma…

Lokali

Ta’ tnax-il sena sofriet diżabilità minħabba mard u wara ħafna snin ta’ żwieġ kellha tifel bil-kundizzjoni down syndrome. Minkejja l-isfidi, Lorraine Pellicano tgħid li Thomas berkilha ħajjitha u ħerqana li…

Lokali

Meqjusa fost l-ewwel tobba f’Malta li bdiet taħdem bla heda mal-vittmi tad-droga, ħidmet it-tabiba Maria Sciberras tfakkret f’konferenza f’għeluq il-25 sena mit-twaqqif tal-Aġenzija Sedqa u fil-jum internazzjonali kontra l-abbuż u…

Aktar