Partit Nazzjonalista
“Li persuna jkollha saqaf fuq rasha huwa dritt fundamentali” – Adrian Delia

Il-Kap tal-Oppożizzjoni Adrian Delia qal li għall-Partit Nazzjonalista l-fatt li persuna jkollha saqaf fuq rasha huwa dritt fundamentali li mill-gvern jiggarantih u jagħmlu prijorità.

F’attività politika f’San Ġwann Dr Delia qal li l-Partit Nazzjonalista ilu x-xhur jitkellem dwar l-akkomodazzjoni soċjali li sejħilha bħala problema akuta li ħoloqha l-Gvern stess u li se tkompli tikber bil-politika li għażel.

Qal li statistika turi li r-rata li biha qed tikber il-popolazzjoni hija ta’ 8.2%. Żied li dan qiegħed iseħħ mhux għax qed jitwieldu aktar trabi, imma għax il-pajjiż qed iġib eluf ta’ ħaddiema barranin f’Malta.

Dr Delia kkritika lill-gvern għax qal li din il-ġimgħa għamel ħafna dikjarazzjonijiet fosthom li l-pensjonijiet huma f’periklu jekk ma jiġux aktar barranin u li l-pagi mhux se jogħlew. Hu stmat li fil-ħames snin li ġejjin il-ħaddiema barranini se jiżdiedu b’60,000 u x’imkien dawn iridu joqgħodu.

Il-Kap Nazzjonalista qal li din il-ġimgħa żar San Pawl il-Baħar u ra li l-iskola għandha 12-il klassi b’110 student u studenta li qed jitgħallmu fil-containers għax l-iskola tal-Qawra minkejja li ilha tlett snin imwiegħda għadha mhix lesta. Żied jgħid li l-Prim Ministru ġġustifika dan billi qal li l-containers huma isbaħ mill-klassijiet infushom.

Dr Delia qal li l-Gvern qed jammetti li falla, li m’għandux soluzzjoni u li l-problema se tkompli tikber. Żied li l-Oppożizzjoni qed tirrikonoxxi l-falliment tal-Gvern f’kull settur u mhix tikritika biss imma qed tuża ż-żmien fl-Oppożizzjoni bilgħaqal u qed taħdem fuq soluzzjonijiet li jaħdmu għal pajjiż żgħir b’art limitata.

Aħbarijiet Oħra
Lokali

“Għajnu Aħmar it-Tonn” jew “It-Tonn tal-Melliħin” kienet l-għajta tas-sajjieda Melliħin li sal-bidu tas-sittinijiet kienu jbiegħu t-tonn li jaqbdu bit-Tunnara. Is-sajd bit-tunnara nqata’ iżda fil-mużew tat-Tunnara fil-bajja tal-Mellieħa, għaqda volontarja Melliħija ikkonservat…

Pulizija

Fl-aħħar xahrejn, l-uċuħ ta’ erba’ Pulizija saru familjari mal-komunità tal-Mellieħa. Ir-residenti laqgħuhom u jqisuhom “ta’ ġewwa”. Dawn l-erba’ uffiċċjali jiffurmaw l-ewwel Community Policing Team fi proġett pilota mniedi mill-Korp. Intervistat…

Malta

Fil-Greċja, hemm madwar 3,500 persuna b’konnessjonijiet Maltin, il-maġġoranza f’Korfu fejn jgħixu Griegi b’nisel Malti li saħansitra jwasslu sar-raba’ u l-ħames ġenerazzjoni. Waqt żjara fil-Greċja, il-President George Vella ltaqa’ ma’ rappreżentanti…

Kisbiet

Imwieled Malta u emigra lejn l-Awstralja 44 sena ilu wara li gradwa mill-Università ta’ Malta dak iż-żmien kienet magħrufa bħala The Royal University of Malta. F’intervista ma’ TVM, il-Professur Stephen…

Aktar