Barranin
Londra b’taxxa ġdida kuljum għal vetturi li jħammġu

Mil-lum sidien ta’ vetturi li għandhom emmissjonijiet għolja iridu jibdew iħallsu taxxa ġdida kuljum jekk isuqu fl-iktar parti traffikuża ta’ Londra.

Din iż-żona diġà kienet suġġett għal miżata għall-konġestjoni (congestion charge), iżda issa dawk li jużaw vetturi antiki f’din il-parti tal-belt se jkollhom iħallsu wkoll £12.50 kuljum.

Il-vetturi milquta huma muturi ta’ qabel l-2007 li mhumiex konformi mal-istandards Euro 3, karozzi u vannijiet petrol ta’ qabel l-2006 li mhumiex Euro 4, u karozzi u vannijiet diesel ta’ qabel l-2015 li mhumiex Euro 6.

Il-miżata hija ferm ogħla għax-xarabanks u t-trakkijiet, li jekk mhumiex konformi mal-istandards Euro 6, se jkollhom iħallsu £100 kuljum.

Dawn il-miżati ddaħħlu bil-għan li jitnaqqsu l-emmissjonjiet b’45% fi żmien sentejn.