Barranin
Ma qablux bejniethom dwar il-politika tas-saħħa

Tliet kandidati Demokratiċi ma qablux dwar il-politika tas-saħħa waqt it-tielet dibattitu tal-partit bi tħejjija għall-elezzjoni Presidenzjali fl-Istati Uniti. Il-kwistjoni kif għandha tiġi rriformata s-sistema tas-saħħa fl-Istati Uniti qasmet lid-Demokratiċi moderati u dawk progressivi.

Id-dibattitu li sar fi Houston Texas kien l-ewwel okkażjoni li kellhom Joe Biden, Elizabeth Warren u Bernie Sanders li jaspiraw li jiġu eletti President tal-Istati Uniti s-sena d-dieħla, biex jiffaċċjaw lil xulxin. Huma biss l-10 kandidati demokratiċi li jikklassifikaw l-ogħla fl-istħarriġ tal-opinjoni pubblika li setgħu jieħdu sehem.

Joe Biden li serva bħala viċi president meta President kien Barack Obama, jinsab fuq quddiem tal-istħarriġ, segwit mis-Senaturi Elizabeth Warren u Bernie Sanders. Waqt id-dibattitu, l-eks leġislatur ta’ Texas Beto O’Rourke ntlaqa’ b’applaws kbir wara appell imqanqal għal kontrol tal-armi iżda kienet il-kwistjoni tas-saħħa l-aktar li qanqlet diskussjoni taħraq.