Politika
“Malta jixirqilha aħjar” – Il-President George Vella

Il-President ta’ Malta George Vella appella biex kulħadd iqis bis-serjetà fejn jista’ jwassal għemilu.

F’messaġġ lin-nazzjon li xxandar illejla, il-President Vella qal li ddiskuta ma’ ħafna nies il-gravità tas-sitwazzjoni preżenti. Qal li dan it-tħassib twassallu b’mod qawwi u b’enfasi partikolari mill-imsieħba soċjali fi ħdan l-MCESD li kellu laqgħa magħhom illum stess.

Fil-messaġġ tiegħu l-President Vella reġa’ appella għall-kalma u biex kulħadd ikun konxju tar-responsabbiltajiet li jġorr. Żied jappella biex f’ambjent iktar kalm u ‘l bogħod minn reazzjonijiet spontanji, nagħrblu ċ-ċirkostanzi li għaddej minnhom il-pajjiż u ningħaqdu flimkien biex bla ma nħarsu lejn wiċċ ħadd, naraw li nħallu l-istituzzjonijiet jagħmlu xogħlhom u li sseħħ il-ġustizzja.

Dr Vella qal li dan biss jista’ jibda t-triq lura lejn in-normalità, qabel ma l-ħsara li qed issir lill-pajjiż f’tant oqsma, inkluż dawk internazzjonali, issir waħda irreparabbli. Temm jgħid li Malta jixraqilha aħjar.