Malta se tospita l-Eurovision Young Dancers fl-2017

Wara l-ewwel parteċipazzjoni ta’ Malta fil-Eurovision Young Dancers ix-xahar li għadda, tħabbar uffiċjalment li pajjiżna se jkun qiegħda jospita l-edizzjoni tal-2017.  F’konferenza tal-aħbarijiet, il-Ministru tal-Ġustizzja, Gvern Lokali u Kultura Owen Bonnici qal li din hija aħbar tajba li se tkun qed tgħolli l-profil għal pajjiżna fil-qasam tal-arti.  Huwa qal li jinsab konvint li din l-attività se tħalli legat importanti fl-arti bħalma ġara fil-Junior Eurovision Song Contest.

Il-Eurovision Young Dancers ilu jsir mill-1985 kull sentejn fejn jagħti l-opportunità lill-aqwa żeffiena mhux professjonali fl-Ewropa biex jikkompetu bejniethom għat-titlu ta’ European Young Dancer.

Min-naħa tiegħu, iċ-Chairman tal-PBS Dr Tonio Portughese qal li fattur ewlieni li wassal għall-għażla ta’ Malta kienet il-binja tas-Sala tal-Mediterran għall-Konferenzi.  Semma wkoll li fis-sottomissjoni ta’ Malta biex tospita dan l-avveniment kien hemm ukoll il-faċilitajiet turistiċi u l-patrimonju kulturali.  Żvela kif diġà hemm interess dwar il-festival li se jittella’ f’Malta tant li l-Ġermanja, l-Iżvezja u l-Olanda indikaw li se jkunu qed ixandru t-trażmissjoni diretta tal-Eurovision Young Dancers 2017.

Il-Kap Eżekuttiv tal-PBS Anton Attard qal li f’Jannar li ġej se jiġu Malta uffiċjali mill-EBU biex jitrattaw l-arranġamenti tekniċi meħtieġa biex jittella’ dan l-avveniment f’Malta.  Qal li fix-xhur li ġejjin se tkun qed toħroġ sejħa pubblika għall-parteċipanti biex issir il-konkors nazzjonali fl-ewwel kwart tal-2017 li permezz tiegħu ssir l-għażla tar-rappreżentant/a Malti/ja għall-Eurovision Young Dancers 2017.

Min-naħa tiegħu, iċ-Chairman ta’ Dar il-Mediterran Dr Kenneth Spiteri qal li hemm sinerġija bejn il-PBS u l-MCC. Qal li minbarra li mistenni jkompli jospita attivitajiet oħra kulturali u artistiċi inkluż tal-PBS, Dar il-Mediterran se tkun qed tatrezza ruħha bi studjo apposta biex jintuża minn Żfin Malta.

Iż-żeffiena Maltija Anthea Zammit, li ħadet sehem fl-edizzjoni tal-Eurovision Young Dancers li għaddiet, qalet li l-esperjenza li ħadet mill-festival tar-Repubblika Ċeka tgħallmet ħafna minnha u nfetħulha wkoll opportunitajiet ġodda billi fost l-oħrajn ġiet mistiedna tiżfen f’Jannar li ġej fis-Slovenja.

Il-Ministru Bonnici żied jgħid li permezz tal-Eurovision Young Dancers, il-Public Broadcasting Services se jkun qiegħed isaħħaħ l-arti taż-żfin f’Malta. Sostna li ma jixtieqx li l-Maltin jibqgħu Malta biss u jibdew jesportaw it-talent tagħhom lil hinn minn xtutna.

Aħbarijiet Oħra
Stejjer Umani

F’aktar minn ħamsin sena, l-Għaqda Alkoħoliċi Anonimi għenet mijiet ta’ persuni bi problema ta’ xorb żejjed, u ħafna drabi anke lill-qraba tagħhom permezz tal-AL-ANON. TVM tkellem ma’ raġel li 27…

Infrastruttura

Għaddejin l-aħħar tħejjijiet għat-tlestija ta’ Triq Ħal Luqa, li hija l-arterja ewlenija bejn Santa Luċija u Ħal Luqa. Bejn it-Tlieta filgħodu u l-Erbgħa waranofsinhar, it-triq se tingħalaq f’direzzjoni waħda sakemm…

Trasport

Matul l-aħħar snin, Transport Malta flimkien mal-Ministeru tat-Trasport nedew diversi skemi fuq ix-xiri ta’ mezzi tat-trasport biex jonqos it-tniġġis tal-arja. Tnejn mill-iskemi li qed jagħtu riżultati huma għax-xiri tal-karozzi elettriċi…

Annimali

Uffiċjali u membri tal-FKNK żaru l-Iskola Primarja ta’ Ħ’Attard fejn indirizzaw it-tfal li bħalissa qed jattendu Skola Sajf. Il-membri kellhom magħhom Kelb tal-Kaċċa ta’ Malta u Kelb tal-Fenek, bit-tfal li…

Aktar