Sport
Maratona fil-pixxina tan-Neptunes b’risq l-atleti tal-Ispecial Olympics

Wara s-suċċess tal-atleti Maltin tal-Olimpjadi Speċjali b’rebħ ta’ erbgħin midalja fil-logħob dinji ta’ Marzu li għadda, tissokta ħidmet il-fondazzjoni Marigold biex permezz ta’ din il-pjattaforma tagħti opportunitajiet sportivi lil atleti b’diżabilità intellettwali. F’San Ġiljan għaddejja maratona ta’ waterpolo bis-sehem ta’ madwar 400 atleta.

F’atmosfera sportiva, fil-pixxina tal-klabb tan-Neptunes f’San Ġiljan għaddejja maratona ta’ 24 siegħa logħob tal-waterpolo. Gilmour Borg u Ann Ebejer kienu fost l-ewwel atleti tal-Olimpjadi Speċjali li daħlu fl-azzjoni. Huma qalu li jitħarrġu fl-atletika, iżda għamlu l-almu tagħhom biex jagħtu l-aħjar prestazzjoni fil-waterpolo.

Minkejja li għaddew ix-xhur mill-esperjenza li kellhom fl-Emirati Għarab Magħquda fil-logħob dinji tal-Olimpjadi Speċjali, iż-żgħażagħ qalu li għadhom jgħożżu l-esperjenza u dak kollu li tagħmel magħhom id-delegazzjoni Maltija.

“Nista’ nkun min irrid jiena, m’għandix label fuqi. Jiena Gilmour u nagħmel hekk, hekk, u hekk. Ħadd ma jgħidli li inti ma tistax, b’bibien miftuħin li mingħajr l-Ispecial Olympics ma nkunx jiena,” qal l-atleta Gilmour Borg.

“Mindu daħal f’ħajti, spiċċajt niddedika ħajti fl-Ispecial Olympics u ġġagħlni napprezza iktar id-differenza fin-nies,” qalet Ann Ebejer, atleta oħra.

Id-Direttur tal-Ispecial Olympics Malta, Anna Calleja, qalet li l-ġbir tal-flus biex jappoġġjaw atleti b’dizabilita’ intellettwali hu wieħed biss mill-għanijiet ta’ din il-maratona. “Ma nħarsux lejn il-ġbir tal-fondi biss iżda nħarsu lejn l-atleti tagħna qed jingħataw opportunita’ f’element inklussiv.”

Il-maratona, li qed issir b’inizjattiva ta’ Timmy Camilleri, missier atleta tal-Olimpjadi Speċjali, tibqa’ għaddejja sal-Ħadd f’nofsinhar.

Aħbarijiet Oħra
Budget

Il-Ministru għall-Finanzi, Edward Scicluna qal li l-Budget ippreżentat ilbieraħ u r-reazzjoni ġenerali għalih huma turija li l-Gvern hu konxju tal-isfidi, l-opportunitajiet u l-ħtiġijiet tan-nies. F’konferenza tal-aħbarijiet l-għada tal-Budget, il-Ministru Scicluna…

Saħħa

Kull sena f’Malta jfeġġu madwar 20 każ ta’ kanċer fit-testikoli. Hu stmat li kull sena jmutu żewġt irġiel b’dan il-kanċer. Stħarriġ li sar ix-xahar li għadda wera li tnejn minn…

Kronaka

Lejlet it-tieni anniversarju mill-qtil ta’ Daphne Caruana Galizia tnieda rapport imħejji minn Reporters Without Borders u The Shift News dwar ċ-ċirkostanzi li fihom seħħ il-qtil, l-investigazzjoni li saret dwaru, ir-reazzjoni…

Immigrazzjoni

Il-Forzi Armati kienu Involuti f’salvataġġ ieħor ta’ immigranti fl-ibħra fir-responsabbiltà ta’ Malta. 76 immigrant illejla ddaħħlu b’patrol boat fil-kwartieri tal-Iskwadra Marittima f’Xatt it-Tiben. Fost l-immigranti kien hemm 15-il mara, b’uħud…

Aktar