Ambjent
Masterplan biex il-widien jingħataw il-protezzjoni

Sal-aħħar tas-sena d-dieħla l-Aġenzija Ambjent Malta ser ikollha Masterplan biex il-widien ikunu mmaniġġjati ferm aħjar. Il-Master plan qed jitħejja b’riċerka iffinanzjata mill-programm Life tal-Unjoni Ewropea. Il-Masterplan huwa l-ewwel pass biex il-widien jingħataw il-protezzjoni li jixirqilhom ħalli titħares l-ekosistema filwaqt li jservu ta’ pulmun għall-ħajja umana.

L-Aġenzija Ambjent Malta tinsab fit-tieni fażi tal-programm Life li beda f’Jannar tas-sena l-oħra biex sa tmiem is-sena d-dieħla jitlesta Master Plan għall-immaniġġjar tal-widien. L-uffiċjal Xjentifiku Ewlieni ta’ Ambjent Malta, Alexander Borg Galea qal li l-uffiċjali qed janalizzaw informazzjoni li qed tinġabar minn aktar minn 100 kilometru ta’ widien fil-gżejjer Maltin.

Alexander Borg Galea qal “dan il-proġett qed nagħmluh Ambjent Malta b’kollaborazzjoni mal-Aġenzija tal-Ilma u l-Enerġija fejn bażikament qed nagħmlu studju fil-widien, rajna x’informazzjoni diġà hemm dwar l-ekoloġija u l-edroloġija tal-widien, ġbarnieha ġo database u issa qed naraw x’hemm aktar informazzjoni li hemm bżonn biex tgħinna nimmaniġġjaw il-widien b’mod aktar effiċjenti biex nikkonservaw il-biodiversità u l-importanza tal-widien li jsostnu l-ilma tal-pjan”.

Iċ-Chairman ta’ Ambjent Malta Conrad Borg Manche qal li dal-proġett huwa importanti għaliex il-widien fost oħrajn iservu biex jinġabar l-ilma tal-pjan.

Conrad Borg Manche qal “dak li jassorbi l-wied jinżel fl-ilma tal-pjan li huwa importanti ħafna għall-ekosistema li għaddejjin taħt l-art għax ftit nies jafu li taħt l-art hemm bjar kbar li l-ilma tax-xita, jiffiltra l-ilma u jispiċċa fl-ilma tal-pjan u n-natura hija katina u huwa importanti li l-ministeri jaħdmu bejniehom biex il-proġett isir fl-intir tiegħu flimkien mhux sempliċiment fil-wiċċ fejn jaraw in-nies”.

Il-Ministru tal-Ambjent Jose Herrera qal li bil-programm LIFE ser ikunu magħrufa l-azzjonijiet li għandhom jittieħdu għall-ħarsien tal-widien. Il-Ministru tal-Enerġija u l-ilma Joe Mizzi qal li l-informazzjoni li ser tinġabar ser tkun ta’ għajnuna anke għall-pajjiżi oħra Mediterranji. Is-Segretarju Parlamentari Aaron Farrugia qal li l-fondi għal dan il-programm inkisbu direttament mill-Kummissjoni Ewropea u mhux mil-fondi allokati għal Malta. Dr Farrugia qal li ser jitwaqqaf unit biex jinġibu aktar fondi mill-programmi tal-Kummissjoni Ewropea li għandhom baġit ta’ €3.5 biljun.

Aħbarijiet Oħra
Air Malta

Il-Ministru għat-Turiżmu, Konrad Mizzi qal li fil-jiem li ġejjin se jitħabbru riżultati finanzjarji pożittivi għal-linja nazzjonali tal-ajru. Fil-ftuħ tal-fiera annwali tal-ivjaġġar, l-AMITEX, il-Ministru qal li l-viżjoni tal-Gvern hi li l-Air…

Politika

Fi Brussell, kien hemm ukoll il-Kap tal-Partit Nazzjonalista, Adrian Delia, li attenda għal-laqgħa tal-kapijiet tal-partiti membri tal-Partit Popolari Ewropew. Stqarrija tal-Partit Nazzjonalista kkowtat lil Dr Delia jgħid li jeħtieġ li…

Politika

Il-Prim Ministru Joseph Muscat qal li r-realtà fid-drama dwar Brexit hi li jiġri x’jiġri, l-UE se tkun qed ittawwal il-ħruġ tar-Renju Unit mill-UE b’ġimgħa biss, għax jekk il-ġimgħa d-dieħla il-Parlament…

Sport

Sens kbir ta’ sodisfazzjon u arja ta’ festa fost il-kontinġent Malti li kkompeta fil-logħob dinji tal-Ispecial Olympics. It-28 atleta b’diżabbiltà intellettwali ġejjin lura Malta b’erbgħin midalja, 12 minnhom tad-deheb. L-atleti…

Aktar