Kurżitajiet
Mhux jibagħtu lil uliedhom l-iskola minħabba invażjoni ta’ orsijiet

Ġenituri f’arċipelagu Russu li jinsab f’post remot ħafna qed jibżgħu jibagħtu lil uliedhom l-iskola wara invażjoni ta’ orsijiet polari fiż-żona residenzjali fejn joqogħdu.  Dan qed jiġi rrappurtat mill-media Russa hekk kif l-orsijiet qed jattakkaw lin-nies biex jidħlu fil-binjiet.

Bliet fl-istat ta’ Novaya Zemlya li jinsab fil-Grigal tax-xatt Russu ilhom minn Diċembru jiġu assedjati mill-orsijiet tant li bħalissa jinsabu fi stat t’emerġenza.  L-orsijiet polari qed jiżdiedu f’dawn l-inħawi minħabba l-bidla fil-klima tant li qed jiġu sfurzati jersqu lejn iż-żoni fejn joqogħdu n-nies minħabba li l-ispazju tagħhom huwa ristrett.

Il-World Wildlife Fund (WWF) qed tgħin fir-rondi li qed isiru f’dawn il-komunitajiet biex ma sseħħx xi traġedja u l-orsijiet jispiċċaw joqtlu lil xi ħadd.  L-għaqda introduċiet numru ta’ għodod biex iservu ta’ deterrent għall-orsijiet biex ma jersqux qrib in-nies u jkunu ta’ periklu għalihom.