Konsumatur
Mil-lum se nibdew inħallsu inqas għat-telefonati lejn pajjiżi tal-UE

Mil-lum 15 ta’ Mejju, il-prezz fuq it-telefonati u l-messaġġi fl-Istati Membri tal-UE ma jistgħux jaqbżu l-limiti l-ġodda introdotti fi Brussell.

Din hija t-tieni kisba marbuta mal-komunikazzjoni, wara t-tneħħija tat-tariffi tar-roaming, li se tkun qed twassal benefiċċji tanġibbli lill-konsumaturi u n-negozji fl-UE kollha.

Dan intqal fi stqarrija maħruġa mill-Ewroparlamentari Maltija Marlene Mizzi, li nnegozjat iż-żewġ leġiżlazzjonijiet dwar it-tneħħija tat-tariffi tar-roaming u l-introduzzjoni ta’ telefonati internazzjonali orħos fl-Ewropa.

Hija ġiet ikkowtata tgħid fl-istqarrija li llum huwa jum importanti u rebħa kbira għall-konsumaturi Ewropej, kif ukoll għaliha personali, bħala l-MPE Maltija li nnegozjat il-leġiżlazzjonijiet tat-tariffi tar-roaming u tat-telefonati intra-Unjoni.

Wara t-tmiem tat-tariffi tar-roaming f’Ġunju 2017, dawn il-prezzijiet il-ġodda huma parti minn reviżjoni tar-regoli tat-telekomunikazzjoni madwar l-UE kollha bil-għan li negħlbu d-diskrepanzi kbar fil-prezz li jeżistu bejn l-Istati Membri.

Il-prezz standard ta’ telefonata intra-Unjoni minn linja fissa jew bil-mobile jvarja minn tliet darbiet għal għaxar darbiet ogħla mill-prezz standard ta’ telefonata domestika fl-Istati Membri differenti. Din id-diskrepanza issa tneħħiet.

L-operaturi tat-telekomunikazzjoni fl-UE se jkunu marbutin li jinfurmaw lill-konsumaturi b’dawn il-limitazzjonijiet il-ġodda. Ir-regoli se jkunu qed japplikaw fit-28 pajjiż tal-UE mill-15 ta’ Mejju u fiż-żmien li ġej fin-Norveġja, l-Islanda u Leichtenstein.

Aħbarijiet Oħra
Trasport

Minn għada t-Tnejn, l-ewwel ta’ Ġunju, ser jerġgħu jitħallew isiru l-eżamijiet, kemm prattiċi u tat-teorija, għal-liċenzji tas-sewqan. L-eżamijiet kienu twaqqfu lura f’Marzu minħabba l-imxija tal-COVID-19 u issa ser ikomplu b’għadd…

Lokali

Inkjesta Maġisterjali li nvestigat denunzji li tressqu mill-għaqda Repubblika b’allegazzjonijiet dwar qtil ta’ immigranti, u attentat ta’ qtil ta’ oħrajn ix-xahar li għadda, sabet li dawn ma kinux imsejsa fuq…

Infrastruttura

Il-ħsara fil-parti ta’ fuq tat-telgħa tas-Saqqajja mhix żgħira, b’din l-arterja prinċipali tat-traffiku fir-Rabat jaf ikollha tibqa’ magħluqa għall-karozzi diversi ġimgħat. Għal Infrastructure Malta l-interventi li se jsiru mhumiex sempliċi xogħol…

Ekonomija u Finanzi

Għalkemm minn tmiem il-ġimgħa li għaddiet beda jitbexxa l-bieb biex terġa’ tibda l-attività ekonomika fil-pajjiż, stħarriġ xjentikfu li sar minn Dr Vincent Marmara juri li d-domanda mill-konsumaturi ser tibqa’ kajman…

Aktar