Lokali
Min jagħmel Masters jew Dottorat mhux se jħallas income tax sa sentejn wara li jispiċċa l-kors

Tħabbar inċentiv ta’ ħelsien tat-taxxa tad-dħul għal persuni li jagħmlu korsijiet biex jiksbu kwalifika f’livell ta’ Masters jew Dottorat. Waqt li ħabbru din l-inizjattiva li kienet wegħda elettorali u l-miżuri fil-budget ta’ din is-sena, il-Ministri Evarist Bartolo u Edward Scicluna saħqu li din qed issir biex il-pajjiż ikompli jinvesti u jtejjeb il-kapital uman meħtieġ biex l-ekonomija tkompli tikber.

Il-Gvern ħabbar li persuni ta’ inqas minn 40 sena li jiksbu kwalifika fil-livell ta’ Masters jew Dottorat, jistgħu jiffrankaw milli jħallsu t-taxxa għal sena jew sentejn.

Il-Ministru tal-Edukazzjoni Evarist Bartolo spjega li min jikseb masters jew kwalifika ekwivalenti fil-livell MQF 7 jiffranka l-ħlas tal-income tax għal sena. Persuni li jiksbu dottorat jew kwalifika ekwivalenti fil-livell MQF 8 jiffrankaw sentejn taxxa fuq id-dħul tiegħu. Spjega li l-eżenzjoni ta’ taxxa tingħata fuq dħul sa massimu ta’ €60,000.

Il-Ministru Bartolo qal li l-istudenti li bdew jagħmlu masters jew dottorat fis-snin ta’ qabel iżda li għadhom ma lestewhiex – jikkwalifikaw għal kreditu ta’ taxxa pro rata. Huwa qal li din l-inizjattiva se toffri ċans lill-persuni li jiddeċiedu li jkomplu bl-istudju tagħhom u li ma bbenefikawx minn boroż ta studju oħra.

Il-Ministru tal-Finanzi Edward Scicluna qal li din il-miżura, li kienet wegħda elettorali u tħabbret fl-aħħar baġit, ċert tiswa lill-Gvern mas-€7 miljun.

Il-Professur Scicluna qal li studju li sar wera li sal-2022 fl-ekonomija Maltija ser ikunu meħtieġa 13,500 ħaddiem f’karigi ta’ managers u professjonali.

“Għandna bżonn iktar xjentisti, nies professjonali. Dan huwa investiment fil-pajjiż. Biex il-pajjiż javvanza b’mod awtonomu jrid ikollok dak il-livell għoli” qal il-Ministru Scicluna.

Il-Ministru Scicluna spjega li benfiċċju sħiħ ser jingħata lil min jagħmel il-kors full time waqt li dawk li jistudjaw fuq bażi part time jikkwalifika għal nofs l-eżenzjoni mit-taxxa tad-dħul.

Aħbarijiet Oħra
Politika

Il-President Marie-Louise Coleiro Preca żvelat li sena ilu, fl-eqqel tad-dibattitu dwar l-emendi għal-liġi tal-IVF, hija għenet biex id-Deputat Prim Ministru Chris Fearne jikkonvinċi ruħu bl-argumenti tas-soċjetà ċivili kontra l-introduzzjoni tat-tqala…

Parlament

Il-Prim Ministru Joseph Muscat qal illi f’taħditiet mal-esperti tal-Moneyval fi ħdan il-Kunsill tal-Ewropa jemmen illi l-Gvern jasal biex jagħti riżultat tajjeb lil Malta fejn tidħol il-ġlieda kontra l-ħasil tal-flus. Huwa…

Parlament

Il-Parlament approva mill-ewwel qari ħames abbozzi ta’ liġi li jirriformaw l-qasam tal-Ġustizzja. L-abbozzi tressqu kollha mill-Ministru għall-Ġustizzja, Kultura u Gvern Lokali Owen Bonnici u se jdaħħlu fis-seħħ proposti li saru…

Aktar