Lokali
“Mingħajr il-kaċċa ma ngħixx” – Jessica Borg, waħda mill-ftit kaċċaturi nisa f’Malta

Kull meta nitkellmu dwar il-kaċċa f’pajjiżna, l-ewwel li jiġi f’moħħna huwa ‘raġel bis-senter’. Iżda Jessica Borg tkisser dan l-isterjotip għaliex Jessica ilha bid-delizzju tal-kaċċa 10 snin. TVM ltaqa’ magħha fl-aħħar jum tal-istaġun tal-kaċċa fir-Rebbiegħa.

Jessica, li għandha 28 sena, hija waħda mill-ftit kaċċaturi nisa f’Malta. Sa minn tfulitha, kienet tmur għall-kaċċa ma’ missierha. Għal Jessica, in-namra għall-kaċċa qiegħda ġo fiha.

”Meta għalaqt it-18-il sena mbagħad applikajt għal-liċenzja tal-kaċċa u bdejt noħroġ waħdi u anki mar-raġel għall-kaċċa. Dejjem inkunu flimkien,” qalet Jessica.

Hija omm ta’ żewġ ulied u taħdem. Madankollu, xorta jirnexxielha ssib ħin għall-kaċċa. ”Ovvjament nilħqu kompromess jien u r-raġel. Noħroġ jien u hu joqgħod mat-tfal jew inkella viċi-versa,” qalet Jessica.

Ma tħosshiex ħuta barra mill-ilma li hi waħda mill-ftit kaċċaturi nisa f’Malta.”Hawn Malta hawn madwar 15-il kaċċatur mara żguri, jekk mhux aktar,” stqarret waħda mill-ftit kaċċaturi nisa f’Malta.

Qabel kellha t-tfal, il-leave kienet iġġemmgħu. ”Dejjem nippjanah għal żmien il-kaċċa biex inkun nista’ mmur nikkaċċja. Kont nippjanah sew minn qabel biex ħadd ma joħodli xi ġurnata li jien irrid inkun qiegħda għall-kaċċa,” stqarret Jessica.

Jessica tistqarr li dan huwa d-delizzju tagħha.”Ma naħsibx li nista’ ngħix mingħajr il-kaċċa għax il-kaċċa hija parti kbira minn ħajti. Ilha minn dejjem,” sostniet Jessica.

Minkejja t-tradizzjoni f’familtha, mhux se timbutta lil uliedha biex isiru kaċċaturi. “Mhux l-għażla tiegħi bħala omm li se nisfurzahom biex imorru għall-kaċċa,” fissret Jessica.

Jessica qalet li n-namra għall-kaċċa twieldet biha u mhux żviluppatha maż-żmien.

 

 

Aħbarijiet Oħra
Annimali

Żiemel li kien għaddej mit-triq deher li beża’ xħin għaddiet minn ħdejh karozza tal-linja. Huwa kien għaddej minn Triq Bormla, iż-Żejtun. Il-filmat, meħud nhar it-Tlieta li għadda juri ż-żiemel bis-serkin…

Kurżitajiet

Jekk fil-Parlament ma jikbrux fjuri, fl-istadium nazzjonali f’Ta’ Qali donnu hemm iktar ċans li jinbtu l-pjanti! Ritratti li nxterdu fuq il-media soċjali juru diversi siġġijiet bi xtieli u pjanti bil-fjuri dehru…

Annimali

Il-kunflitt kulturali reġa’ spikka wara l-istorja ta’ TVM li xxandret ilbieraħ dwar il-proposta tal-Imam Mohammed El Sadi biex il-biċċiera Musulmani jkollhom iċ-ċans li f’Malta joqtlu l-annimali skont it-tradizzjoni Musulmana tal-halal….

Saħħa

Tifel ta’ 4 snin miet ilbieraħ wara li aktarx instab li kellu mikrobu li jikkaġuna l-meninġite. Huwa miet f’Mater Dei wara li jidher li kellu xi sintomi li wasslu biex…

Aktar