Minkejja li rreżista r-riformi l-Gvern kellu jimplimenta t-tibdil li qaltlu l-Kummissjoni Venezja -Adrian Delia

Il-Kap tal-Oppożizzjoni Adrian Delia qal li minkejja li rreżista r-riformi l-Gvern kellu jimplimenta t-tibdil li qaltlu l-Kummissjoni Venezja.

Waqt li kien qed jindirizza attività politika fiż-Żurrieq illejla, il-Kap Nazzjonalista qal li dan sar wara pressjoni qawwija mill-Oppożizzjoni.  Qal li t-tibdiliet implimentati skont kif mitlub mill-Kummissjoni Venezja huma simili għar-riformi li l-Partit Nazzjonalista ilu xhur jgħid lill-Gvern iwettaq.

Dr Delia qal li l-Oppożizzjoni ilha tikkritika lir-rwol doppju tal-Avukat Ġenerali, li fi kliem il-Kap Nazzjonalista kien qed joħloq kunflitt ta’ interess għaliex waqt li huwa l-Avukat tal-Gvern, fl-istess ħin huwa jrid jiddeċiedi jekk jiħux passi kontra membri tal-Gvern.

Il-Kap Nazzjonalista qal li jeħtieġ jiddaħħlu miżuri konkreti għat-tisħiħ tad-demokrazija u tibdiliet li jassiguraw l-indipendenza tal-istituzzjonijiet biex iservu liċ-ċittadini. Qal li l-Gvern ħataf l-istituzzjonijiet taħt idejh u qed jaħdem bla pjan għal bosta setturi bħas-saħħa, it-trasport, l-infrastruttura u l-ambjent.