Lokali
Minn April se tibda tingħata kura b’xejn għall-Epatite C

Il-Ministeru tas-Saħħa qed jippjana li sal-2025, f’Malta ma jibqawx persuni morda bl-Epatite Ċ.

Għal dan il-għan tfasslet strategija ta’ kura, screening u prevenzjoni kontra dal-virus li sal-lum joqtol wieħed minn kull tliet persuni li jiġu infettati bih. Fit-tnedija tal-istrateġija, id-deputat Prim Ministru u Ministru għas-Saħħa Chris Fearne ħabbar li ser jibdew jiġu trattati mal-mitejn pazjent kull sena, b’kura ġdida wara li l-Gvern innegozja prezz biex din tkun affordabbli.

Minn April li ġej pazjenti bil-virus tal-Epatite Ċ, se jingħataw trattament b’xejn li jfejjaq għal kollox din il-marda.

Id-Deputat Prim Ministru u Ministru tas-Saħħa Chris Fearne ħabbar dan fil-bidu ta’ konsultazzjoni pubblika dwar l-istrateġija nazzjonali għall-eliminazzjoni tal-virus tal-Epatite Ċ.

L-istrateġija tkopri wkoll programm ta’ prevenzjoni u screening ta gruppi vulnerabbli sabiex sal-2025 din il-marda tkun eliminata għal kollox minn Malta.

Il-Ministru Fearne qal li tnejn minn kull tliet pazjenti bl-Epatite Ċ jirnexxielhom jgħixu bil-marda imma għal bqija l-virus iwassal għall-kumplikazzjonijiet serji fil-fwied inkluż kanċer tal-fwied.

Huwa qal li l-kura ġiet żviluppat madwar tliet snin ilu iżda l-prezz kien għal dil-kura kien jilħaq mal-€75,000 għal kull pazjent. Qal li fl-aħħar sentejn, saru negozjati biex il-Gvern jixtri din il-mediċina bi prezz raġjonevoli.

Il-Ministru għas-Saħħa Chris Fearne qal “ġibna prezzijiet ħafna aktar affordabbli u aktar minn hekk ilħaqna ftehim li nħallsu biss bħala Gvern għal dawk il-każijiet fejn il-mediċini jaħdmu. Jiġifieri dawk il-pazjenti li jfiequ l-Gvern iħallas għalihom, dawk il-pazjenti li ma jfiequx, għalkemm il-pazjent xorta jkun ħa l-mediċina u ma jħallas xejn għaliha.”

Dr Fearne qal li r-rata ta’ suċċess hija ta’ madwar 90 fil-mija u huwa ppjanat li jiġu ttrattati mal-200 pazjent fis-sena. Huwa stmat li bħalissa f’Malta hawn madwar 1,000 pazjent b’din il-marda.

L-ispeċjalista fis-saħħa pubblika Sascha Reiff qal li l-pazjenti li għandhom l-Epatite Ċ, se jibgħatu għalihom mill-Out Patients tal-isptar biex jibdew it-trattament.

L-Ispeċjalista fis-saħħa pubblika Sascha Reiff qal “se nibdew b’dawk in-nies, l-iżjed li qed ibatu minn din il-marda bħalissa ilhom ħafna bil-mard u diġà għandhom il-kumplikazzjonijiet. Imma eventwalment malli jgħaddu l-ħames snin inkunu trattajna lil kulħadd.”

Dr Reiff żied jgħid li ser isir screening għal din il-marda ta’ persuni li jabbużaw mid-droga, persuni li jaħdmu fil-qasam tas-saħħa u r-residenti fil-Faċilità Korrettiva ta’ Kordin li huma f’riskju akbar li jieħdu dan il-virus.

Ara wkoll:

Aġġornat: trattament b’xejn għall-Epatite Ċ fuq rakkomandazzjoni tal-Ombudsman

Aħbarijiet Oħra
Lokali

Minkejja li 30 sena ilu tilef nofs wiċċu u sofra ġrieħi gravi meta ġġarraf b’ajruplan żgħir, il-bdot Ivan Gatt ma jibżax jirkeb l-ajruplan, la bħala bdot u lanqas bħala passiġġier….

Lokali

Numru ta’ proprjetajiet tal-Gvern li mhumiex jintużaw ser jgħaddu f’idejn għaqdiet mhux governattivi li joffru programmi ta’ housing bħala parti minn skema ġdida mnedija mis-Segretarjat Parlamentari għall-Akkomodazzjoni Soċjali. Is-sejħa għall-applikazzjonijiet…

Lokali

L-Awtorità tal-Ippjanar qalet li għamlet spezzjoni fil-barriera tal-Imqabba li skont artiklu fuq il-ġurnal The Times of Malta għexieren ta’ ħaddiema Torok li jaħdmu għal Taca Construction diġà qed jgħixu fis-sit, fejn…

Toroq

Il-Kummissarju għall-Ambjent u l-Ippjanar fl-uffiċċju tal-Ombudsman ma sabx li kienx hemm amministrazzjoni ħażina mill-awtoritajiet konċernati fl-iżvilupp ta’ Triq Louis Wettinger f’Ta’ Masrija, magħrufa bħala l-bypass tal-Mellieħa. Dan joħroġ mir-rapport tal-investigazzjoni…

Aktar