Kurżitajiet
Minn fejn ġejja l-kelma ċisk?

Il-kelma ċisk hija sinonima mal-birra ikonika Maltija iżda għandha għeruq ħafna aktar antiki li jmorru lura għall-1840, meta twaqqaf l-ewwel bank privat f’Malta.

Giuseppe Scicluna kien negozjant li waqqaf dan l-ewwel bank privat fil-pajjiż u fl-1929, kien ha f’idejh l-operat ta’ wieħed mill-klijenti tiegħu li kien ingħata liċenzja biex jimmanifattura l-birer tat-tip Pilsner u Munchener, fil-kumpanija li saret magħrufa bħala The Malta Export Brewery.

Iżda l-kelma ċisk eżattament minn fejn nibtet? In-norma dak iż-żmien għall-popolin u n-negozjanti medji kienet li jaħbu l-flus li kienu jaħdmu għalihom jew f’xi kaxxa tar-ram, taħt is-sodda jew f’boroż tal-ġilda fi ħwejjiġhom. Iżda, dawn bdew jitħajjru jżommu flushom f’kont kurrenti fil-bank ta’ Scicluna u maż-żmien ukoll daħlet fosthom is-sistema taċ-ċekkijiet. Id-depożituri, li ftit kienu jafu jaqraw u jiktbu, kienu jsibuha bi tqila biex jgħidu l-kelma ‘cheque’ u minflok kienu jsejħulha ‘cisk’, b’Giuseppe Scicluna nnifsu jsir magħruf ukoll bħala ‘iċ-ċisk’.

Din is-sena, iċ-Cisk Lager qed tiċċelebra d-90 sena tagħha bħala l-birra ewlenija Maltija li għamlet isem mhux biss fostna l-Maltin iżda anke barra minn xtutna.